ہزہائی نس پرنس رحیم آغاخان کا متوقع دورہ چترال، انتظامات کا جائزہ لینے کیلئے ڈپٹی کمشنرکا دیدار گاہ کا دورہ
۔
اپر چترال (نمائندہ چترال ٹائمز) ڈپٹی کمشنر اپرچترال محمد عمران خان اور ایڈیشنل ڈپٹی کمشنر جنرل معظم خان بنگش نے پرواک لشٹ مستوج میں زیر تعمیر دیدار گاہ کا دورہ کیا، جہاں اسماعیلی کمیونٹی کی روحانی پیشوا پرنس رحیم آغا خان کی مئی کے آخری عشرے میں متوقع آمد کے سلسلے میں جاری انتظامات کا تفصیلی جائزہ لیا۔
دورے کے دوران حکام نے متعلقہ افسران اور رضاکاروں سے ملاقات کی اور جاری تیاریوں پر اطمینان کا اظہار کرتے ہوئے ہدایت کی کہ اس اہم موقع کے پیش نظر انتظامات کو مزید بہتر اور مربوط بنایا جائے۔
ڈپٹی کمشنر اور ایڈیشنل ڈپٹی کمشنر جنرل نے اسماعیلی کمیونٹی کے رضاکاروں کی خدمات کو سراہتے ہوئے کہا کہ ان کی محنت ہزہائی نس کے دورے کو کامیاب بنانے میں کلیدی کردار ادا کرے گی۔ انہوں نے ضلعی انتظامیہ کی جانب سے سیکیورٹی سمیت ہر ممکن تعاون کی یقین دہانی بھی کرائی تاکہ تمام انتظامات احسن انداز میں مکمل کیے جا سکیں۔
اس موقع پر ڈپٹی کمشنر نے متعلقہ اداروں کو دیدار گاہ تک آنے والی سڑکوں کی صفائی اور بہتری کے لیے بھی ہدایات جاری کیں۔
ذرائع کے مطابق پرنس رحیم الحسینی آغا خان مئی کے آخری دنوں میں چترال اور گلگت بلتستان کا چھ روزہ دورہ کریں گے، جس کے دوران اپر چترال کے پرواک مستوج اور لوئر چترال کے گرم چشمہ میں اسماعیلی کمیونٹی کے اجتماعات سے خطاب متوقع ہے۔
چترال میں اس دورے کو انتہائی اہمیت دی جا رہی ہے اور مقامی عوام کو امید ہے کہ اس موقع پر علاقے کی پسماندگی کے خاتمے اور مزید ترقیاتی منصوبوں کے اعلانات بھی کریں گے۔ یاد رہے کہ آغا خان ڈویلپمنٹ نیٹ ورک گزشتہ کئی دہائیوں سے چترال میں تعلیم، صحت، انفراسٹرکچر، آبپاشی اور دیگر شعبوں میں نمایاں خدمات انجام دے رہا ہے اور حکومتی اداروں کے شانہ بشانہ ترقیاتی کاموں میں مصروف عمل ہے۔
