پشاور سے بڑی مقدار میں بچھڑے کا خراب گوشت چترال پہنچانے کی کوشش ضلعی انتظامیہ نے ناکام بنادی
چترال( نمائندہ چترال ٹائمز ) پشاور سے بڑی مقدار میں بچھڑے کا خراب گوشت چترال پہنچانے کی کوشش ضلعی انتظامیہ نے ناکام بناتے ہوئے گوشت قبضے میں لے کر ملز م عدنان ولد خالد خان کو گرفتار کرلیا جوکہ گل بہار پشاور کا رہائشی ہے جبکہ رواں ہفتے کے دوران یہ اپنی نوعیت کا دوسرا واقعہ ہے جس میں گلا سڑا اور متغفن گوشت چترال پہنچاکر مہنگے داموں بیچنے کی کوشش ناکام بنادی گئی۔ ذرائع کے مطابق ایڈیشنل اسسٹنٹ کمشنر دروش خلیل اللہ نے چترال لیویز کی مدد سے پشاور اور پنڈی سے آنے والی گاڑیوں میں لائی جانے والی خراب اورناقابل استعمال گوشت کی چیکنگ کے دوران ایک فلائنگ کوچ سے بڑی مقدار میں ایک ماہ سے بھی کم عمر کی بچھڑے کا گوشت برامد کرلیا جوکہ چھوٹا گوشت کے طور پر صارفین کو فروخت کرنے کے لئے لایا جارہا تھا۔
گوشت کو قبضے میں لے کر ملزم کے خلاف پولیس اسٹیشن عشریت میں تعزیرات پاکستان کے دفعات 269اور 273کے تحت مقدمہ درج کرلیا گیا۔ ابتدائی تفتیش کے دوران معلوم ہوا ہے کہ پشاور اور دوسرے شہروں سے بھینس کے مردہ بچھڑے کو چھوٹا گوشت ظاہر کرتے ہوئے مہنگے داموں فروخت کرنے کے لئے مافیا سرگرم ہے۔ گزشتہ ہفتے بھی لواری ٹنل کے قریب براڈام کے مقام پر ایڈیشنل اے سی دروش خلیل اللہ نے بچھڑے کا گوشت اور بیمار ولاغر بھینس چترال لانے کی کوشش ناکام بنادی تھی۔
