خیبر پختونخوا میں آفات سے نمٹنے کی تیاری کو مزید مؤثر اور مربوط بنانے کے لیے پی ڈی ایم اے نے تمام 36 اضلاع سے تفصیلی مشاورت کے بعد پورے صوبے کے لیے جامع منصوبہ جاری کر دیا
پشاور ( نمائندہ چترال ٹائمز ) خیبر پختونخوا میں آفات سے نمٹنے کی تیاری کو مزید مؤثر اور مربوط بنانے کے لیے پراوِنشل ڈیزاسٹر مینجمنٹ اتھارٹی (پی ڈی ایم اے) نے تمام 36 اضلاع سے تفصیلی مشاورت کے بعد پورے صوبے کے لیے جامع منصوبہ جاری کر دیا ہے۔ وزریر اعلیٰ خیبر پختونخوا کے سپیشل اسسٹنٹ برائے ریلیف ملک نیک محمد خان نے آج پی ڈی ایم اے ہیڈکوارٹر میں اس منصوبے کا باقاعدہ افتتاح کیا۔اس منصوبے میں خطرات کے مطابق اضلاع کی درجہ بندی، ہنگامی امدادی سامان کی پیشگی فراہمی، اور مقامی ضروریات کے مطابق 20 کروڑ 50 لاکھ روپے کے فنڈز کی تقسیم شامل ہے، تاکہ کسی بھی ممکنہ ہنگامی صورتحال میں بروقت اور مؤثر ردعمل یقینی بنایا جا سکے۔منصوبے کی افتتاحی تقریب کے دوران ڈائریکٹر جنرل پی ڈی ایم اے اسفندیار خٹک نے صوبائی وزیر اور دیگر افسران کو ادارے کی تیاریوں اور اقدامات سے تفصیلی طور پر آگاہ کیا۔پی ڈی ایم اے نے مون سون کے ممکنہ خطرات کے پیشِ نظر عوام سے اپیل کی ہے کہ وہ ہوشیاری اختیار کریں، خطرناک اور نشیبی علاقوں سے گریز کریں، اور سرکاری اداروں کی طرف سے جاری کردہ ہدایات پر عمل کرتے ہوئے اپنی اور دوسروں کی حفاظت یقینی بنائیں۔