چترال میں گرمی کی شدت برقرار، پی ڈی ایم اے کی طرف سے گلاف الرٹ جاری، آئندہ ہفتے بارشوں کا امکان
پشاور (نمائندہ چترال ٹائمز) صوبائی ڈیزاسٹر مینجمنٹ اتھارٹی (پی ڈی ایم اے) نے خیبر پختونخوا میں آئندہ ہفتے تیز اور وقفے وقفے سے بارشوں کے امکان کے پیش نظر “گلاف الرٹ” جاری کر دیا ہے۔ پی ڈی ایم اے کے مطابق، ان شدید بارشوں کے باعث گلیشیائی علاقوں میں گلیشیائی جھیلیں (GLOFs) پھٹنے کا خدشہ ہے۔پی ڈی ایم اے نے چترال اپر اور لوئر، دیر، سوات اور اپر کوہستان کے عوام کو خصوصی طور پر محتاط رہنے کی ہدایت کی ہے۔ تیز بارشوں کے باعث ان علاقوں میں لینڈ سلائیڈنگ اور مقامی ندی نالوں میں طغیانی کا بھی اندیشہ ہے۔ضلعی انتظامیہ کو حساس مقامات کی نگرانی، بروقت وارننگ جاری کرنے اور انخلا کی مشقیں یقینی بنانے کا حکم دیا گیا ہے۔عوام کو ندی نالوں کے قریب غیر ضروری نقل و حرکت سے گریز کرنے اور تیز بہاؤ والے پانی میں گاڑیاں لے جانے سے سختی سے منع کیا گیا ہے۔سیاحوں کو بھی محتاط رہنے اور احتیاطی تدابیر اختیار کرنے کا کہا گیا ہے۔سڑکوں کی بروقت بحالی کے لیے نیشنل ہائی وے اتھارٹی (این ایچ اے)، فرنٹیئر ورکس آرگنائزیشن (ایف ڈبلیو او)، اور محکمہ سی اینڈ ڈبلیو کو الرٹ رہنے اور پیشگی اقدامات کرنے کی ہدایت دی گئی ہے۔پی ڈی ایم اے نے عوام کے لیے آگاہی مہم بھی شروع کر دی ہے تاکہ انہیں ممکنہ نقصانات سے بچاؤ کے اقدامات سے آگاہ کیا جا سکے۔ کسی بھی ہنگامی صورتحال سے نمٹنے کے لیے پی ڈی ایم اے کا ایمرجنسی آپریشن سنٹر مکمل طور پر فعال ہے۔ عوام کسی بھی ناخوشگوار واقعے کی اطلاع اور معلومات کے لیے ہیلپ لائن 1700 پر رابطہ کر سکتے ہیں۔