پاکستان کو افغانستان کے راستے ازبکستان تک ریلوے سے جوڑنے کیلئے فیزیبلٹی پرکام شروع کردیا گیا ہے، حنیف عباسی
اسلام آباد( چترال ٹائمزرپورٹ )پاکستان کو افغانستان کے راستے ازبکستان تک ریلوے سے جوڑنے کا بڑا منصوبہ سامنے آگیا جب کہ وزیر ریلوے حنیف عباسی نے کہا کہ اس سال 31 دسمبر تک پاکستان سے ازبکستان تک ریلوے ٹریک کی فزیلبٹی سامنے لے آئیں گے۔اسپیکر ایاز صادق کی زیر صدارت جاری قومی اسمبلی اجلاس میں حنیف عباسی نے کہا کہ پاکستان ازبکستان ریلوے ٹریک پر 10 ارب ڈالر لاگت آئے گی، افغانستان ریلوے ٹریک کو حفاظت فراہم کرے گا، پاکستان ازبکستان ریلوے کے لئے فنڈنگ کہاں سے آئے گی، ابھی بتانا نہیں چاہتے۔اس دوران جے یو آئی رکن عالیہ کامران نے کہا کہ ایم ایل ون تو آپ بنا نہیں سکے، ازبکستان تک ریلوے ٹریک کے دعوے کررہے ہیں، اس پر وزیر ریلوے نے جواب دیتے ہوئے کہا کہ ایم ایل ون کے مختلف ٹریکس پر تیزی سے کام جاری ہے، مختلف ریلوے ٹریکس پر کام کی مسنگ رہی ہے، اب اسے مکمل کرنے جارہے ہیں۔وزیر ریلوے حنیف عباسی نے کہا کہ کراچی سے اسلام آباد تک اگلے دور میں بلٹ ٹرین چلائیں گے، وزارت ریلوے کراچی ریلوے اسٹیشن کو 10 ستمبر کو ایسا بنا دے گی جیسا 77سال میں نہیں بنا۔