پولیو مہم کے دوران شاندار کارکردگی کا مظاہرہ کرنے والے افسران، عملے اور فرنٹ لائن پولیو ورکرز کے اعزاز میں ڈپٹی کمشنر لوئیر چترال کے آفس میں خصوصی تقریب کا انعقاد
چترال ( نمائندہ چترال ٹائمز ) لوئر چترال میں پولیو مہم کے دوران شاندار کارکردگی کا مظاہرہ کرنے والے افسران، عملے اور فرنٹ لائن پولیو ورکرز کے اعزاز میں ایک خصوصی تقریب کا انعقاد کیا گیا۔ یہ تقریب ڈپٹی کمشنر آفس لوئر چترال میں منعقد ہوئی جس میں ضلعی انتظامیہ کے افسران و سٹاف، محکمہ صحت کے افسران و اہلکاروں، لیویز جوانوں اور فرنٹ لائن پولیو ورکرز نے شرکت کی۔
تقریب کے دوران پولیو مہم میں بہترین خدمات انجام دینے والے افسران اور عملے میں تعریفی اسناد تقسیم کی گئیں، جن کا مقصد ان کی محنت، لگن اور فرض شناسی کا اعتراف کرنا تھا۔ اس موقع پر ڈپٹی کمشنر لوئر چترال نے خطاب کرتے ہوئے پولیو کے مکمل خاتمے کے لیے ضلعی انتظامیہ، محکمہ صحت اور فرنٹ لائن ورکرز کی مشترکہ اور مربوط کوششوں کو سراہا۔
ڈپٹی کمشنر نے کہا کہ پولیو جیسی موذی بیماری کے خاتمے کے لیے دیانتدارانہ فرائض کی انجام دہی، مؤثر ٹیم ورک اور عوامی تعاون انتہائی ضروری ہے۔ انہوں نے افسران، اہلکاروں اور پولیو ورکرز کی انتھک محنت اور قربانیوں کو خراجِ تحسین پیش کرتے ہوئے اس عزم کا اظہار کیا کہ آئندہ بھی اسی جذبے، ذمہ داری اور پیشہ ورانہ انداز میں خدمات انجام دی جاتی رہیں گی تاکہ لوئر چترال کو مستقل طور پر پولیو فری ضلع بنایا جا سکے۔
تقریب کے اختتام پر شرکاء نے پولیو کے خاتمے کے قومی مشن میں بھرپور کردار ادا کرنے کے عزم کا اعادہ کیا۔
