لوئیر چترال لیویز فورس کا پہلی مرتبہ باضابطہ دربار کا انعقاد، کمانڈنٹ اور ڈپٹی کمانڈنٹ کی باوردی شرکت، جوانوں کی حوصلہ افزائی
چترال ( نمائندہ چترال ٹائمز) لیویز فورس نہ صرف ضلعی امن و امان میں اہم کردار ادا کر رہی ہے بلکہ یہ ایک باوقار اور نظم و ضبط سے آراستہ فورس کے طور پر ابھر رہی ہے۔ ان خیالات کا اظہار ڈپٹی کمشنر اور کمانڈنٹ لوئر چترال لیویز راو ہاشم عظیم نے گورنر کاٹیج چترال میں منعقدہ دربار لوئر چترال لیویز فورس سے خطاب کرتے ہوئے کیا۔ دربار میں ایڈیشنل ڈپٹی کمشنرز، اسسٹنٹ کمشنر / ڈپٹی کمانڈنٹ لیویز فورس، صوبیدار میجر، سپرنٹنڈنٹ لیویز فورس اور جوانوں نے کثیر تعداد میں شرکت کی۔
دربار کے آغاز میں کمانڈنٹ نے لیویز کے جوانوں سے خطاب کرتے ہوئے کہا کہ لیویز اہلکار ضلعی انتظامیہ کا اثاثہ ہیں، جو دن رات عوام کے جان و مال کے تحفظ کے لیے سرگرمِ عمل ہیں۔ انھوں نے کہا کہ لیویز شہداء کی خدمات اور کردار کو کسی صورت فراموش نہیں کیا جا سکتا۔ اس موقع پر لیویز کے اہلکاروں کو درپیش مسائل، تبادلوں، سہولیات اور دیگر انتظامی امور پر کھل کر بات چیت کی گئی۔ جنہیں ڈپٹی کمشنر / کمانڈنٹ لیویز نے بغور سنا اور یقین دہانی کرائی کہ ان کے مسائل کو ترجیحی بنیادوں پر حل کرا دیۓ جائنگے۔
کمانڈنٹ نے اہلکاروں پر زور دیا کہ وہ اپنی ڈیوٹی نہایت ایمانداری، فرض شناسی اور عوامی خدمت کے جذبے سے سرانجام دیں۔ ریاستی ادارے عوام کی خدمت کے لیے ہوتے ہیں اور لیویز کا ہر جوان عوام کے ساتھ حسن سلوک، خوش اخلاقی اور ذمہ داری کا عملی نمونہ بنے اور لائن ڈیپارٹمنٹس کے شانہ بشانہ کام کریں۔ کمانڈنٹ لیویز فورس نے امید ظاہر کی کہ لوئر چترال لیویز فورس دیگر اضلاع کے لیے ایک مثالی فورس کے طور پر سامنے آئے گی۔
یادرہے کہ لوئیر چترال لیویز فورس کا یہ پہلا باضابطہ دربار تھا ، جس میں کمانڈنٹ اور ڈپٹی کمانڈنٹ چترال لیویز باوردی ہوکر جوانوں کی حوصلہ افزائی کی۔
