افغان مہاجرین کی باعزت وطن واپسی کے لیے ضلعی انتظامیہ لوئیر چترال کی طرف سے محدود مدت کےلئے فری کوسٹر سروس کا آغاز
لوئر چترال( نمائندہ چترال ٹائمز ) افغان مہاجرین کی باعزت اور محفوظ وطن واپسی کو یقینی بنانے کے لیے ضلعی انتظامیہ لوئیر چترال نے ایک اہم اور قابلِ تحسین اقدام اٹھاتے ہوئے فری کوسٹر سروس کا باقاعدہ آغاز کر دیا ہے۔ اس اقدام کا مقصد افغان مہاجرین کو سہولت فراہم کرنا اور ان کی واپسی کے عمل کو منظم، محفوظ اور باوقار بنانا ہے۔
ضلعی انتظامیہ کے مطابق یہ سروس محدود مدت کے لیے فراہم کی جا رہی ہے، تاکہ وطن واپسی پر افغان مہاجرین کو کسی قسم کی دشواری کا سامنا نہ ہو۔ انتظامیہ نے واضح کیا ہے کہ اس سہولت سے استفادہ کے لیے مہاجرین کو چند شرائط پر عمل کرنا ہوگا۔
انتظامیہ کے مطابق افغان مہاجرین کے لیے ڈپٹی کمشنر آفس سے NOC حاصل کرنا لازمی قرار دیا گیا ہے، جبکہ بغیر NOC کسی بھی فرد کو کوسٹر سروس فراہم نہیں کی جائے گی۔ اسی طرح سفر کے دوران مہاجرین کو اپنے تمام متعلقہ شناختی اور سفری دستاویزات ہمراہ رکھنا ضروری ہوگا۔
ضلعی انتظامیہ کا کہنا ہے کہ یہ سروس صرف ابتدائی مرحلے کے لیے رکھی گئی ہے، جس کے بعد افغان مہاجرین اپنی مدد آپ کے تحت اپنے وطن واپس جائیں گے۔ اس اقدام کو انتظامیہ کی جانب سے مہاجرین کے ساتھ انسانی ہمدردی اور ذمہ دارانہ رویے کی ایک واضح مثال قرار دیا جا رہا ہے۔
ضلعی انتظامیہ نے افغان مہاجرین سے اپیل کی ہے کہ وہ مقررہ ضوابط پر عمل کرتے ہوئے اس سہولت سے فائدہ اٹھائیں اور انتظامیہ کے ساتھ تعاون کو یقینی بنائیں۔