خیبرپختونخوا حکومت نے پاک قطر تکافل کے ساتھ کنٹریبیوٹری پروویڈنٹ فنڈ سکیم کے معاہدہ پر دستخط کر لیے
خیبر پختونخوا حکومت نے کنٹریبیوٹری پروویڈنٹ فنڈ سکیم میں تیرھویں فنڈ مینیجر کو رجسٹرڈ کر لی

پشاو ر( نمائندہ چترال ٹائمز ) وزیر اعلیٰ خیبرپختونخوا کے مشیر خزانہ مزمل اسلم کی زیر نگرانی سیکرٹری خزانہ عامر سلطان ترین نے خیبرپختونخوا حکومت کی جانب سے پاک قطر تکافل کے ساتھ کنٹریبیوٹری پروویڈنٹ فنڈ اسکیم کے معاہدہ پر دستخط کر لیے۔ خیبرپختونخوا حکومت کی پاک قطر تکافل کے ساتھ معاہدہ کی ایک سادہ اور پروقار تقریب محکمہ خزانہ کے کانفرنس روم پشاور میں منعقد ہوئی جس میں مشیر خزانہ خیبرپختونخوا مزمل اسلم، سیکرٹری خزانہ خیبرپختونخوا عامر سلطان ترین، ایڈیشنل سیکرٹری بجٹ ارشد علی، ڈیبیٹ سیل کے ٹیم لیڈ عبدلقیوم، ڈپٹی ڈائریکٹر پنشن سیل نوید عالم سیمت پاک قطر تکافل کے نمائندہ وفد نے شرکت کی۔ مشیر خزانہ خیبرپختونخوا مزمل اسلم نے کہا کہ خیبر پختونخوا حکومت اپنی پنشن اصلاحات کے اقدامات کو مزید مضبوط بنانے کے لیے کنٹریبیوٹری پروویڈنٹ فنڈ (CPF)

سکیم کو وسعت دے رہی ہے، جو کہ 2022 میں صوبائی سرکاری ملازمین کے لیے متعارف کرائی گئی ایک نمایاں پنشن سکیم ہے اور اب تک 59,000 سے زائد سرکاری ملازمین کو CPF سکیم کے تحت رجسٹر کیا جا چکا ہے۔ یہ پروگرام سرکاری ملازمین کے مالی مستقبل کو محفوظ بنانے کے لیے ایک مشترکہ شراکت داری کے ماڈل پر مبنی ہے — جس میں ملازم اپنی بنیادی تنخواہ کا 10% جبکہ حکومت 12% ماہانہ حصہ ڈالتی ہے۔اس موقع پر بتایا گیا ہے کہ کنٹریبیوٹری پروویڈنٹ فنڈ سکیم کی ایک اہم خصوصیت اس کی سرمایہ کاری کا آؤٹ سورس ہونا ہے، جو والینٹری پنشن سسٹم ماڈل کے تحت چلتاہے — ایک منظم پنشن فریم ورک جو کہ 2005 سے سیکورٹیز اینڈ ایکسچینج کمیشن آف پاکستان (SECP) کے تحت ریگولیٹ کیا جا رہا ہے۔ خیبر پختونخوا حکومت نے اس ماڈل کو صوبے کی ضروریات کے مطابق ڈھال کر اختیار کیا ہے۔

مشیر خزانہ خیبرپختونخوا نے بتایا کہ کنٹریبیوٹری پروویڈنٹ فنڈ اسکیم صرف اُن اثاثہ جات منیجمنٹ کمپنیوں سے سرمایہ کاری کا انتظام کراتی ہے جنہیں SECP سے لائسنس حاصل ہو اور جن کی کم از کم درجہ بندی AM2 ہو — جو پیشہ ورانہ فنڈ مینجمنٹ کے اعلیٰ معیار کی عکاسی کرتا ہے۔ اسکیم کے آغاز سے اب تک حکومت نے 12 ایسی لائسنس یافتہ کمپنیوں کے ساتھ معاہدے کیے تھے۔معاہدہ کی تقریب میں بتایا گیا کہ پاک قطر فیملی تکافل لمیٹڈ نے حال ہی میں اپنا VPS لائسنس حاصل کیا اور CPF سکیم میں فنڈ مینیجر کے طور پر شمولیت کے لیے درخواست دی۔ مکمل جانچ پڑتال کے بعد، خیبر پختونخوا حکومت نے 23 جولائی 2025 کو دفتر سیکریٹری خزانہ کے ذریعے پاک قطر کے ساتھ باضابطہ معاہدہ کر لیا۔ اس معاہدے کے تحت صوبہ پاک قطر CPF سرمایہ کاری کو سنبھالنے والے تیرھویں منظور شدہ فنڈ مینیجر کی حیثیت سے پینل کا حصہ بن گیا ہے۔اس توسیع سے خیبر پختونخوا حکومت کے اس عزم کا اظہار ہوتا ہے کہ وہ اپنے پنشن کے نظام کے تحت متنوع، پیشہ ورانہ طور پر منظم، اور شریعت کے مطابق سرمایہ کاری کے اختیارات فراہم کرے گا تاکہ شفافیت، طویل مدتی پائیداری، اور ملازمین کے اعتماد کو یقینی بنایا جا سکے۔