وزیراعلیٰ ایک ماہ، کابینہ پندرہ دنوں، ممبران اسمبلی سات دنوں، اسکیل سترہ سے اوپر دو دنوں جبکہ اسکیل ایک سے سولہ تک ملازمین کی ایک دن کی تنخواہ سیلاب زدگان کو دینے کا فیصلہ
پشاور ( نمائندہ چترال ٹائمز ) وزیر اعلیٰ خیبرپختونخوا علی امین خان گنڈاپور نے صوبے کے مختلف اضلاع میں حالیہ سیلاب متاثرین کو ریلیف کی فراہمی کے سلسلے میں ایک اہم اقدام کے طور پر اپنی ایک مہینے کی تنخواہ سیلاب زدگان کی امداد کیلئے دینے کا فیصلہ کیا ہے۔ اسی طرح صوبائی کابینہ اراکین کی 15 دنوں کی تنخواہیں جبکہ ممبران صوبائی اسمبلی کی سات دنوں کی تنخواہیں بھی متاثرین کی امداد کیلئے دینے کا فیصلہ کیا گیا ہے۔علاوہ ازیں اسکیل 17 اور اوپر کے ملازمین کی دو دنوں جبکہ اسکیل ایک سے 16 تک کے ملازمین کی ایک دن کی تنخواہ سیلاب زدگان کیلئے دی جائے گی۔
وزیر اعلیٰ علی امین گنڈاپور نے ان عطیات کے شفاف استعمال کیلئے طریقہ کار وضع کرنے کا بھی فیصلہ کیا اور کہا کہ اس مقصد کیلئے پراونشل ڈیزاسٹر مینجمنٹ اتھارٹی (پی ڈی ایم اے) میں ایک خصوصی اکاونٹ کھولا جائے گا اور اس فنڈ کے استعمال کیلئے ایک صاف اور شفاف طریقہ کار اپنایا جائے گا۔ انہوں نے مزید کہا کہ اس فنڈ کی ایک ایک پائی کا حساب رکھا جائے گا اور اس کی تمام تفصیلات سے عوام کو آگاہ کیا جائے گا۔ وزیر اعلیٰ کا کہنا تھا کہ سیلاب زدگان ہماری خصوصی توجہ اور تعاون کے مستحق ہیں، مشکل کی اس گھڑی میں ہم سب کو دل کھول کر متاثرین کی مدد کرنی چاہیے۔