گورنر خیبر پختونخوافیصل کریم کنڈی کا عیدالاضحی مبارک موقع پر امتِ مسلمہ بالخصوص خیبر پختونخوا اور ضم شدہ اضلاع کے عوام کو دلی مبارکباد
پشاور ( نمائندہ چترال ٹائمز ) گورنر خیبر پختونخوافیصل کریم کنڈی نے عیدالاضحی 1446 ھجری کے مبارک موقع پر امتِ مسلمہ بالخصوص خیبر پختونخوا اور ضم شدہ اضلاع کے عوام کو دلی مبارکباد پیش کی ہے۔ انہوں نے اس دن کی روحانی، سماجی اور اخلاقی اہمیت پر روشنی ڈالتے ہوئے کہا کہ عیدالاضحی ایثار، قربانی، خلوص اور انسانیت کے جذبے کی تجدید کا دن ہے، جو ہمیں حضرت ابراہیم علیہ السلام اور حضرت اسماعیل علیہ السلام کی بے مثال اطاعت و قربانی کی یاد دلاتا ہے۔ گورنر نے عوام سے اپیل کی کہ وہ عید کی خوشیوں میں غریب، نادار اور مستحق افراد کو بھی شریک کریں، تاکہ یہ خوشی سب کے لیے یکساں ہو۔ عید کے ایام ہمیں باہمی اخوت، ہمدردی اور اتحاد و یگانگت کا پیغام دیتے ہیں۔
گورنر نے مزید کہا کہ اسلام امن، رواداری اور بھائی چارے کا دین ہے۔ ہمیں بحیثیت مسلمان اس بابرکت موقع پر یہ عہد کرنا ہوگا کہ ہم نہ صرف اپنی ذات، بلکہ پوری انسانیت کی خدمت کو اپنا مشن بنائیں گے۔ یہ ہماری اجتماعی ذمہ داری ہے کہ ہم ملک و ملت کے استحکام، ترقی اور خوشحالی کے لیے متحد رہیں اور ہر چیلنج کا سامنا یکجہتی سے کریں۔ گورنرنے کہا کہ ہمیں اس عظیم دن کی برکت سے یہ سبق لینا چاہیے کہ ہم اپنے وطن عزیز کی سلامتی، خودمختاری اور ترقی کے لیے ہر سطح پر اتحاد و اتفاق قائم رکھیں، اور یہ عہد کریں کہ پاکستان کی خوشحالی کے لیے کسی قربانی سے دریغ نہیں کریں گے۔گورنر نے کہا کہ اللہ تعالیٰ ہم سب کی قربانیاں اپنی بارگاہ میں قبول فرمائے، ملک و ملت کو امن، ترقی اور خوشحالی عطا فرمائے اور ہمیں اپنی تعلیمات پر خلوص دل سے عمل کرنے کی توفیق دے۔#
وزیر اعلیٰ خیبر پختونخوا علی امین خان گنڈاپورکا عیدالاضحی کے پرمسرت موقع پر پوری قوم خصوصا ًخیبرپختونخوا کے عوام کو مبارکباد
پشاور ( چترال ٹائمزرپورٹ ) وزیر اعلیٰ خیبر پختونخوا علی امین خان گنڈاپور نے عیدالاضحی کے پرمسرت موقع پر پوری قوم خصوصا ًخیبرپختونخوا کے عوام کو مبارکباد دی ہے۔ عید الاضحی کے موقع پر یہاں سے جاری اپنے تہنیتی پیغام میں وزیر اعلیٰ نے کہا ہے کہ عید الاضحی عالم اسلام کے لئے خوشی کا سب سے بڑا تہوار ہے جو ہمیں ایثار ، محبت، اتفاق اور ایک دوسرے کے لئے جینے کا درس دیتا ہے۔ اس دن سنت ابراہیمی کی ادائیگی ہمیں اللہ تعالی کی رضاجوئی کے ساتھ ساتھ دوسروں کے دکھ درد کو بانٹنے کے لئے ایثار و قربانی کا احساس دلاتی ہے۔
انہوں نے عوام خصوصا ًمعاشرے کے صاحب ثروت لوگوں پر زور دیا ہے کہ وہ عیدکے اس پر مسرت موقع پر اپنے ارد گرد نادار اور مستحق لوگوں کو اپنی خوشیوں میں ضرور شریک کریں اور یہی اس عظیم اسلامی تہوار کی اصل روح اور انسانیت کی معراج ہے۔ وزیر اعلیٰ نے کہا کہ عیدالاضحی کا یہ اہم دن ہمیں اللہ تعالی کی رضا اور خوشنودی حاصل کرنے کے ساتھ ساتھ اتحاد، اتفاق ، یگانگت، امن اور سلامتی کا درس بھی دیتا ہے جو دین اسلام کا آفاقی پیغام ہے۔وزیراعلی نے اس موقع پر عوام سے خصوصی اپیل کی ہے کہ وہ سنت ابراہیمی کی ادائیگی کے بعد صفائی ستھرائی کا خاص خیال رکھیں اور اس سلسلے میں صفائی عملے کے ساتھ بھر پور تعاون کریں۔ اپنے ارد گرد ماحول کو صاف ستھرا رکھنا ہماری مشترکہ ذمہ داری اور اہم مذہبی فریضہ ہے۔