کاغلشٹ میلے کا انعقاد آئندہ سال سے محکمہ کھیل کی زیر نگرانی منعقد کیا جایگا، بروغل فیسٹیول ماہ جولائی میں منعقد کیا جایگا۔ صوبائی مشیر کھیل و امورِ نوجوانان تاج محمد خان ترند
پشاور (نمائندہ چترال ٹائمز) کاغلشٹ میلہ جس کا انعقاد ماضی میں محکمہ سیاحت کے زیر اہتمام ہوتا تھاآئندہ سال سے اس کا انعقاد باقاعدہ طور پر محکمہ کھیل کے تحت کیا جایگا جبکہ کاغلشٹ میلے کو باقاعدہ پی سی ون میں بھی شامل کرلیا گیا ہے تاکہ اس ایونٹ کو مزید منظم اور موثر انداز میں منعقد کیا جاسکے۔ان خیالات کا اظہار صوبائی مشیر کھیل و امورِ نوجوانان تاج محمد خان ترند نے ڈپٹی سپیکر ثریا بی بی کی زیر صدارت منعقدہ اجلاس میں کیا۔ڈپٹی سپیکر خیبر پختونخوا اسمبلی ثریا بی بی کی زیر صدارت انکے چیمبر میں ضلع اپر چترال میں کھیلوں کے میدانوں کے قیام، موجودہ پولو گراؤنڈز کی صورتحال، اورسپورٹس سیکٹر کی دیگر سرگرمیوں کے حوالے سے اجلاس کا انعقاد ہوا۔
اجلاس میں وزیر اعلی کے مشیر برائے کھیل و امورِ نوجوانان تاج محمد خان ترند, ڈی جی سپورٹس تاشفین حیدر, ڈسٹرکٹ سپورٹس آفیسر چترال شہناز, اے ڈی سی محمد انور, پراجیکٹ ڈایریکٹر سپورٹس و دیگر افسران نے شرکت کی۔اجلاس میں ڈپٹی سپیکر ثریا بی بی کے استفسار پر بتایا گیا کہ اپر چترال میں سپورٹس کمپلیکس کا قیام اگلے سالانہ ترقیاتی پروگرام میں ڈالا جا رہا ہے تاکہ چترال اپر میں کھیلوں کے لیے ایک بہترین کمپلیکس کا قیام ممکن بنایا جاسکے اور نوجوانوں کو کھیل کود کے بہتر مواقع و سہولیات میسر ہوں۔
مشیر کھیل و ثقافت نے ڈپٹی سپیکر کو بتایا کہ رواں سال کاغلشٹ میلے کی بجاے بروغل فیسٹول اور پولو میچیز کاغلشٹ گراونڈ میں منعقد ہونگے جس سے علاقے میں کھیلوں اور ثقافتی سرگرمیوں کو فروغ ملے گا۔ انہوں نے مزید بتایا کہ اپر چترال گراونڈ کو جدید سہولیات سے آراستہ سٹیڈیم میں اپ گریڈ کیا جائے گا۔ انہوں نے ریشون گراونڈ کے حوالے سے کہا کہ ریشون گراونڈ کے لیے محکمہ کھیل مطلوبہ زمین خریدے گا اور اس حوالے سے مشیر کھیل تاج محمد خان ترند نے محکمہ کو ضروری کاروائی کرنے کی ہدایات بھی جاری کیں۔
بروغل فیسٹیول کے حوالے سے فیصلہ ہوا کہ ماہ جولائی میں فیسٹیول منعقد کیا جایگا۔اسکے علاوہ جوان مرکز کے قیام کے حوالے سے ٹینڈر جاری کیا جاچکا ہے جس پر عنقریب کام شروع کردیا جائے گا۔ محکمہ کھیل چترال اپر ضروری سپورٹس سٹاف کی کمی کو پورا کرنے کے لیے ضروری کاروائی عمل میں لارہا ہے۔ اس ضمن میں متعلقہ سپورٹس افسران کو دفتری کاروائی جلد مکمل کرنے کی ہدایات جاری کی گئی ہیں ڈپٹی سپیکر ثریا بی بی نے مشیر کھیل اور محکمہ کھیل و امورِ نوجوانان کے افسران کا شکریہ ادا کیا جنھوں نے اپر چترال میں کھیلوں کے انعقاد و سہولیات کی فراہمی کے لیے ہر ممکن تعاون کا اظہار کیا۔
