جے یو آئی لوئر چترال کے نو منتخب ضلعی کابینہ کا پہلا اجلاس، علاقے میں ٹیلی نار کی ناقص سروس پر گہری تشویش کا اظہار، دریائے چترال میں چینیلائزیشن کے نام پر مبینہ کرپشن کی فوری تحقیقات کا مطالبہ
چترال (نمائندہ چترال ٹائمز)جے یو آئی لوئر چترال کے نو منتخب ضلعی کابینہ کا پہلا اہم اجلاس بروز اتوار زیر صدارت ضلعی امیر مولانا عبد الشکور منعقدہوا۔ اجلاس کا باقاعدہ آغاز تلاوت کلام پاک سے ہوا۔ ضلعی جنرل سیکرٹری مولانا قاضی محمد الیاس نے کاروائی کا آغاز کیا، جس میں انہوں نے ایجنڈے اور موجودہ حالات پر تفصیل سے روشنی ڈالی۔اجلاس میں درج ذیل فیصلے کیے گئے :
لوئر چترال کے مختلف تحصیلوں کا فوری دورہ کیا جائے گا جس کا شیڈول متفقہ طور پر یہ طے کیا گیا کہ:
کہ 5 جولائی تحصیل ارندو کا دورہ کیا جائیگا، اسی طرح6 جولائی تحصیل دروش کا دورہ، 11 جولائی بروز جمعہ بعد از نماز جمعہ لوٹکوہ کا دورہ
13 جولائی بروز اتوار تحصیل چترال کا دورہ کیا جائیگا،
شعبہ اطلاعات اور مالیاتی نظام کو مزید فعال بنانے جبکہ سیکیورٹی کے شعبے (انصار الاسلام) کو مستحکم کرنے کا فیصلہ کیا گیا۔
اجلاس کے اختتام پر متفقہ طور پر درج ذیل قرار دادیں منظور کی گئیں:
ٹیلی نار کے ناقص سروس پر گہری تشویش کا اظہار کرتے ہوئے فوری طور پر بہتری کا مطالبہ کیا گیا۔حالیہ موسمیاتی تبدیلی اور دریائے چترال میں طغیانی کے باعث متاثرہ علاقوں اور عوام کے نقصانات کا فوری ازالہ کرنے اور متاثرین کو معاوضہ دینے کا مطالبہ کیا گیا۔
دریائے چترال میں چینیلائزیشن (دریا موڑنے) کے نام پر مبینہ کرپشن کی فوری تحقیقات، آئندہ اس عمل پر مکمل پابندی عائد کرنے اور دریا کے دونوں جانب حفاظتی بند باندھنے کا مطالبہ کیا گیا۔ لواری ٹنل اپروچ روڈ پر کام شروع کرنے پر وفاقی حکومت کا خیر مقدم کیا گیا۔
خیبر پختونخوا اسمبلی میں خواتین کی مخصوص نشست کے ذریعے چترال کو نمائندگی دینے پر صوبائی و مرکزی قیادت کا شکریہ ادا کیا گیا اور نو منتخب ایم پی اے عارفہ بی بی کو مبارک باد پیش کی گئی. اجلاس کے آخر میں حالیہ ایام میں انتقال کر جانے والے تمام مرحومین کے ایصال ثواب کے لیے اجتماعی دعائے مغفرت کی گئی۔
