جمیعت علماء اسلام کا چترال میں اسٹامپ پیپرز کے حصول میں مشکلات پر تشویش کا اظہار، فوری پرانا نظام بحال کرنے کا مطالبہ
۔
چترال (نمائندہ چترال ٹائمز )جمیعت علماء اسلام پاکستان کے مرکزی جنرل کونسل کے ممبر قاری جمال عبدالناصر نے وزیر اعلیٰ خیبر پختونخوا اور متعلقہ حکام سے مطالبہ کیا ہے کہ چترال جیسے دور افتادہ اور پسماندہ علاقے کے عوام کی مشکلات کو مدنظر رکھتے ہوئے 500 روپے سے کم مالیت کے اسٹامپ پیپرز کا پرانا طریقہ کار بحال کیا جائے۔
اپنے ایک بیان میں انہوں نے کہا کہ”اسٹامپ پیپرز کے لیے صرف بینکوں پر انحصار کرنے کے فیصلے سے چترال کے غریب عوام اور بالخصوص اسٹوڈنٹس شدید مشکلات کا شکار ہیں۔ دور دراز علاقوں سے آنے والے افراد کو ایک اسٹامپ پیپر کے لیے پورا دن بینک کی لائنوں میں لگنا پڑتا ہے، جس سے ان کا وقت اور پیسہ دونوں ضائع ہو رہے ہیں۔”
اس موقع پر قاری جمال عبد الناصر نے مطالبہ کیا کہ 500 روپے سے کم قیمت کے اسٹامپ پیپرز بینکوں کے بجائے دوبارہ اسٹامپ وینڈرز کے پاس دستیاب کرائے جائیں تاکہ عوام کو آسانی سے میسر ہوں۔
چترال اور دروش میں بینک آف خیبر کی تمام برانچوں کو پابند کیا جائے کہ وہ اس سہولت کو ترجیحی بنیادوں پر فراہم کریں۔
تعلیمی اسناد اور دیگر چھوٹے کاموں کے لیے اسٹامپ پیپر کے حصول کو سادہ بنایا جائے تاکہ طلباء کا قیمتی تعلیمی وقت ضائع نہ ہو۔
انہوں نے مزید کہا کہ چترال کی جغرافیائی صورتحال دیگر شہروں سے مختلف ہے، یہاں انٹرنیٹ اور بینکنگ کی سہولیات ہر جگہ موجود نہیں ہیں۔ لہٰذا حکومت کو چاہیے کہ وہ زمینی حقائق کو دیکھ کر فیصلہ کرے۔ انہوں نے متنبہ کیا کہ اگر یہ دیرینہ مطالبہ پورا نہ کیا گیا تو عوام کی مشکلات میں مزید اضافہ ہوگا، جس کی تمام تر ذمہ داری متعلقہ حکام پر ہوگی۔