تمام مکاتب فکر کے علماء کا مشترکہ اجلاس، متحدہ علماء کونسل چترال کا قیام عمل میں لایاگیا، کابینہ تشکیل
پشاور (نمائندہ چترال ٹائمز) شاور میں متحدہ علماء کونسل چترال کا ایک اہم اور نمائندہ اجلاس منعقد ہوا، جس میں متحدہ علماء کونسل کی مرکزی کابینہ تشکیل دی گئی مولانا خلیل احمد صدر مولانا محبوب علی شاہ سینئر نائب صدر اور مولانا حبیب اللہ انقلابی جنرل سیکرٹری منتخب۔
متحدہ علماء کونسل چترال ایک مشترکہ دینی فورم ہے جس میں چترال سے تعلق رکھنے والے دیوبندی، بریلوی، اہلِ حدیث مکاتب فکر جمعیت علمائے اسلام ,جماعت اسلامی اور اہلسنت والجماعت سے وابستہ علماء کرام شامل ہیں۔
اجلاس میں پشاور میں مقیم چترال سے تعلق رکھنے والے جید، معتبر اور سینئر علماء کرام نے بھرپور شرکت کی۔ اس موقع پر علماء نے اس امر پر زور دیا گیا کہ بحیثیتِ مسلمان ہماری اجتماعی ذمہ داری ہے کہ ہم اتحاد و اتفاق کے ساتھ رہتے ہوئے امتِ مسلمہ کی صحیح رہنمائی کریں۔
شرکاء نے اس بات کا بھی واضح اظہار کیا کہ چترال اپنی مخصوص جغرافیائی، تہذیبی اور سماجی حیثیت کے باعث ایک نہایت اہم ضلع ہے، جہاں کے امن و امان، دینی روایات اور ثقافتی اقدار کا تحفظ ہم سب کی مشترکہ ذمہ داری ہے۔
اجلاس میں اس بات پر اتفاقِ رائے ہوا کہ علاقے میں ہم آہنگی، بھائی چارے اور باہمی احترام کو فروغ دینے کے لیے تمام مکاتبِ فکر کو یکجا ہو کر کردار ادا کرنا ہوگا، تاکہ کوئی بھی فرد یا گروہ چترال کی روایات اور تہذیب کو نقصان نہ پہنچا سکے۔
آخر میں اس بات کا بھی فیصلہ کیا گیا کہ متحدہ علماء کونسل چترال کی نومنتخب مرکزی کابینہ کی حلف برداری کے لیے عنقریب پشاور پریس کلب میں ایک پروقار تقریب کا انعقاد کیا جائے گا، جس کی تاریخ کا اعلان بعد میں کیا جائے گا
