جشن شندور کے حوالے سے ضلعی انتظامیہ چترال اور غذر گلگت بلتستان کا مشترکہ اجلاس، چترال اور گلگت بلتستان کی ثقافتی تہوار کے کامیاب انعقاد کیلئے ہر ممکن تعاون کی یقین دہانی
۔
مستوج ( نمائندہ چترال ٹائمز ) جشن شندور 2026 کے کامیاب انعقاد، باہمی رابطہ کاری کو مزید مؤثر بنانے اور دونوں اطراف کے انتظامی و سیکیورٹی اداروں کے درمیان ہم آہنگی کو فروغ دینے کے حوالے سے ضلعی انتظامیہ اپر چترال، ضلعی انتظامیہ غذر گلگت بلتستان، کلچر اینڈ ٹورزم اتھارٹی خیبر پختونخوا اور متعلقہ سیکیورٹی اداروں کا ایک اہم اجلاس شندور میں منعقد ہوا۔
اجلاس میں ڈپٹی کمشنر اپر چترال، کمانڈنٹ چترال سکاؤٹس، ڈائریکٹر جنرل کلچر اینڈ ٹورزم اتھارٹی خیبر پختونخواہ ، ڈسٹرکٹ پولیس آفیسر اپر چترال، ونگ کمانڈر 144 ونگ مستوج، جنرل منیجر کلچر اینڈ ٹورزم اتھارٹی خیبر پختونخوا ، ایڈیشنل ڈپٹی کمشنر فنانس اینڈ پلاننگ اپر چترال ، اسسٹنٹ کمشنر مستوج، ضلعی انتظامیہ اپر چترال کے دیگر افسران، ڈپٹی کمشنر غذر گلگت بلتستان، ڈسٹرکٹ پولیس آفیسر غذر، سیکیورٹی اداروں کے افسران اور دیگر متعلقہ حکام نے شرکت کی۔
اجلاس میں جشن شندور 2026 کے انتظامات، مختلف اداروں کے مابین رابطہ کاری اور شائقینِ پولو و سیاحوں کو بہترین سہولیات کی فراہمی سے متعلق امور پر تفصیلی تبادلہ خیال کیا گیا۔ شرکاء نے اس عزم کا اظہار کیا کہ تمام ادارے باہمی تعاون اور مشترکہ کوششوں کے ذریعے جشن شندور کو کامیاب، منظم اور یادگار بنانے کے لیے اپنا بھرپور کردار ادا کریں گے۔
اجلاس میں اس بات پر اتفاق کیا گیا کہ جشن شندور کو انتہائی شاندار، منظم اور پُرامن انداز میں منعقد کیا جائے گا تاکہ ملکی و غیر ملکی سیاح، شائقینِ پولو اور مقامی عوام اس منفرد ثقافتی اور کھیلوں کے میلے سے بھرپور لطف اندوز ہو سکیں۔
شرکاء نے اس امر پر زور دیا کہ چترال اور گلگت بلتستان کے عوام صدیوں پر محیط تاریخی، ثقافتی اور سماجی رشتوں میں بندھے ہوئے ہیں۔ پولو دونوں خطوں کا مقبول اور روایتی کھیل ہے جو محبت، بھائی چارے، رواداری اور باہمی احترام کے فروغ میں اہم کردار ادا کرتا ہے۔ جشن شندور دونوں علاقوں کے عوام کو ایک دوسرے کے قریب لانے اور آپس کے ثقافتی ورثے کو اجاگر کرنے کا بہترین موقع فراہم کرتا ہے۔
اجلاس میں یہ بھی طے پایا کہ جشن شندور کے دوران گلگت بلتستان سے آنے والے پولو کھلاڑیوں، آفیشلز، سیاحوں اور شائقین کا بھرپور خیرمقدم کیا جائے گا اور ان کی سہولت، رہنمائی اور بہترین میزبانی کے لیے تمام ضروری انتظامات یقینی بنائے جائیں گے۔
اجلاس کے اختتام پر دونوں اضلاع کی انتظامیہ اور متعلقہ اداروں نے اس عزم کا اعادہ کیا کہ باہمی تعاون، ہم آہنگی اور مشترکہ کاوشوں کے ذریعے جشن شندور 2026 کو ایک کامیاب، یادگار اور مثالی ایونٹ بنایا جائے گا۔
دریں اثنا جشن شندور 2026 کی تیاریوں کو حتمی شکل دینے اور مختلف اداروں کے درمیان باہمی رابطہ کاری کو مزید مؤثر اور مضبوط بنانے کے حوالے سے ضلعی انتظامیہ اپر چترال، چترال سکاؤٹس اور محکمہ پولیس کا ایک اہم اجلاس شندور میں منعقد ہوا۔
اجلاس میں ڈپٹی کمشنر اپر چترال محمد عمران خان، کمانڈنٹ چترال سکاؤٹس، ڈائریکٹر جنرل کلچر اینڈ ٹورزم اتھارٹی خیبر پختونخوا ، ڈسٹرکٹ پولیس آفیسر اپر چترال، ونگ کمانڈر 144 ونگ مستوج، ایڈیشنل ڈپٹی کمشنر فنانس اینڈ پلاننگ اپر چترال ، اسسٹنٹ کمشنر مستوج ، ضلعی انتظامیہ اپر چترال کے دیگر افسران، جنرل منیجر کلچر اینڈ ٹورزم اتھارٹی خیبرپختونخوا، مختلف لائن ڈیپارٹمنٹس کے سربراہان، قانون نافذ کرنے والے اداروں (LEAs) کے نمائندگان، صدر پولو ایسوسی ایشن اور دیگر متعلقہ حکام نے شرکت کی۔
اجلاس کا آغاز شرکاء کے باہمی تعارف سے ہوا جس کے بعد جشن شندور 2026 کے انعقاد کے لیے اب تک کی گئی پیش رفت اور جاری تیاریوں کا تفصیلی جائزہ لیا گیا۔
اجلاس میں سیکیورٹی انتظامات، پولو گراؤنڈ کی تیاری، گراؤنڈ کے اطراف باڑ لگانے، پینے کے صاف پانی کی فراہمی، خیموں کی منظم تنصیب، میڈیکل کیمپ کے قیام، لائیو سٹاک کیمپ کے قیام، ریسکیو 1122 کی خدمات، ایمبولینسوں اور فائر ایکسٹینگویشرز کی دستیابی، فائر بریگیڈ کے انتظام، آلائشوں اور کوڑا کرکٹ کو بروقت ٹھکانے لگانے، ڈسٹ بنز کی تنصیب، تمام خیموں اور راستوں میں مناسب روشنی کے انتظامات اور شائقین کے لیے بیٹھنے کے مناسب انتظامات (Seating Arrangements) سمیت دیگر اہم امور پر تفصیلی غور و خوض کیا گیا۔
اجلاس کو بتایا گیا کہ تمام متعلقہ ادارے اپنے اپنے دائرۂ کار میں ذمہ داریاں احسن انداز میں نبھا رہے ہیں۔ اس موقع پر متعلقہ محکموں کو ہدایت کی گئی کہ وہ اپنے سپرد تمام کاموں کو جلد از جلد مکمل کریں تاکہ جشن کے انعقاد میں کسی قسم کی رکاوٹ پیش نہ آئے۔
اجلاس میں اس عزم کا اعادہ کیا گیا کہ رواں سال جشن شندور کو عوامی امنگوں اور توقعات کے مطابق شاندار انداز میں منعقد کیا جائے گا اور شندور فیسٹیول سے لطف اندوز ہونے کے لیے آنے والے ملکی و غیر ملکی سیاحوں اور تماشائیوں کو بہترین سہولیات فراہم کی جائیں گی۔
شرکاء نے اس بات پر بھی زور دیا کہ جشن شندور اپر چترال اور گلگت بلتستان کے عوام کے درمیان محبت، بھائی چارے، رواداری اور باہمی تعلقات کو فروغ دینے کا ایک اہم ذریعہ ہے۔ یہ جشن دونوں خطوں کے عوام کے درمیان ثقافتی روابط، روایتی ہم آہنگی اور رشتہ داریوں کو مزید مستحکم بنانے میں اہم کردار ادا کرتا ہے۔ اجلاس میں اس عزم کا اظہار کیا گیا کہ دونوں اطراف کی روایات اور ثقافت کا احترام کرتے ہوئے اس بین الاقوامی شہرت یافتہ ایونٹ کو کامیاب بنانے کے لیے بھرپور اقدامات کیے جائیں گے۔
اجلاس میں یہ بھی طے پایا کہ اس اہم بین الاقوامی شہرت کے حامل ایونٹ کے کامیاب انعقاد کے لیے ضلعی انتظامیہ اپر چترال، سیکیورٹی ادارے، متعلقہ محکمے اور دیگر شراکت دار ادارے اپنی تمام تر صلاحیتیں بروئے کار لائیں گے اور باہمی تعاون کے ذریعے جشن شندور 2026 کو ایک یادگار اور کامیاب ایونٹ بنایا جائے گا۔
