انٹر اسکولز زونل فٹسال ٹورنامنٹ کے صوبائی مقابلوں میں ہائی اسکول کوشٹ کی شاندار فتح, فائنل میں بنوں کو 0-3 سے شکست دے کر ٹائٹل اپنے نام کر لیا
پشاور (چترال ٹائمز رپورٹ) انٹر اسکولز زونل فٹسال ٹورنامنٹ کے صوبائی مقابلوں میں اپر چترال کی ٹیم نے شاندار کارکردگی کا مظاہرہ کرتے ہوئے تاریخ رقم کر دی۔ گورنمنٹ ہائی اسکول کوشٹ نے فائنل مقابلے میں بنوں کی مضبوط ٹیم کو 0-3 سے شکست دے کر انٹر اسکولز زونل فٹسال چیمپئن شپ اپنے نام کر لی۔
فائنل میچ میں گورنمنٹ ہائی اسکول کوشٹ اپرچترال کے کھلاڑیوں نے ابتدا ہی سے بھرپور کھیل پیش کیا اور نظم و ضبط، بہترین ٹیم ورک اور اعلیٰ مہارت کے ذریعے حریف ٹیم پر مکمل برتری قائم رکھی۔ فیصلہ کن مقابلے میں کیے گئے تین شاندار گول اس تاریخی کامیابی کی واضح علامت تھے۔
اس موقع پر ڈسٹرکٹ ایجوکیشن آفیسر (میل) اپر چترال محمود غزنوی، جنرل سیکرٹری انٹر اسکولز زونل ٹورنامنٹ و پرنسپل گورنمنٹ ہائی اسکول کوشٹ سیف اللہ اور اسسٹنٹ ڈسٹرکٹ ایجوکیشن آفیسر اسپورٹس ذوالفقار علی شاہ یفتالی گراؤنڈ میں موجود رہے۔ محکمہ تعلیم اپر چترال کے افسران اور اساتذہ کرام نے کھلاڑیوں کی شاندار کارکردگی کو سراہا اور طلبہ کی بھرپور حوصلہ افزائی کی۔
ڈپٹی کمشنر اپر چترال محمد عمران خان نے اس شاندار کامیابی پر گورنمنٹ ہائی اسکول کوشٹ کے طلبہ، اساتذہ اور جملہ منتظمین کو زبردست خراجِ تحسین پیش کرتے ہوئے کہا کہ یہ فتح نہ صرف اسکول بلکہ پورے اپر چترال کے لیے باعثِ فخر ہے۔ انہوں نے امید ظاہر کی کہ طلبہ مستقبل میں بھی اسی جذبے اور محنت کے ساتھ نمایاں کامیابیاں حاصل کرتے رہیں گے۔