اپر و لوئر چترال میں پرنس رحیم آغا خان کی متوقع آمد کے سلسلے میں سیکیورٹی اور انتظامات کوحتمی شکل دیدی گئی، حکام انتظامات کا جائزہ
۔
چترال (نمائندہ چترال ٹائمز) ہز ہائی نس پرنس شاہ رحیم الحسینی آغاخان کی متوقع تشریف آوری کے سلسلے میں اپر اور لوئر چترال میں انتظامات اور سیکیورٹی اقدامات کو حتمی شکل دیدی گئی ہے، جبکہ ضلعی انتظامیہ اور پولیس کی جانب سے مختلف دیدار گاہوں اور اہم مقامات کے دورے جاری ہیں۔
اپر چترال میں ڈپٹی کمشنر محمد عمران خان کی ہدایات پر ایڈیشنل اسسٹنٹ کمشنر مستوج افضل علی نے پرواک مستوج میں قائم دیدار گاہ کا دورہ کیا، جہاں انہوں نے جاری تیاریوں، سیکیورٹی، صفائی، ٹریفک مینجمنٹ، طبی سہولیات، پینے کے پانی اور دیگر انتظامات کا تفصیلی جائزہ لیا۔ جہاں مختلف انتظامات کے ساتھ ریسکیو ۱۱۲۲ کے زیر اہتمام میڈیکل کیمپ کا اہتمام بھی کیا گیا ہے ۔ اس موقع پر ایس ڈی پی او مستوج اور ایس ڈی پی او موڑکہو/تورکہو بھی ان کے ہمراہ تھے۔
متعلقہ حکام اور منتظمین نے دیدار گاہ میں جاری تیاریوں کے حوالے سے بریفنگ دی جبکہ ایڈیشنل اسسٹنٹ کمشنر نے انتظامات پر اطمینان کا اظہار کرتے ہوئے رضاکاروں، انتظامی عملے اور متعلقہ اداروں کی کاوشوں کو سراہا۔ انہوں نے کہا کہ ضلعی انتظامیہ اس اہم موقع کو پُرامن، منظم اور یادگار بنانے کے لیے بھرپور اقدامات کر رہی ہے۔
دریں اثنا لوئر چترال میں پرنس رحیم آغا خان کے متوقع دورے کے حوالے سے پولیس لائن میں خصوصی سیکیورٹی بریفنگ کا انعقاد کیا گیا۔ ایکٹنگ ڈی پی او لوئر چترال عتیق الرحمن نے پولیس جوانوں کو ہائی الرٹ رہنے، داخلی و خارجی راستوں کی مؤثر نگرانی، مشکوک سرگرمیوں پر نظر رکھنے اور ڈیوٹی کے دوران مکمل چوکسی اختیار کرنے کی ہدایات جاری کیں۔
انہوں نے اس بات پر زور دیا کہ پولیس اہلکار نظم و ضبط، پیشہ ورانہ مہارت اور ذمہ داری کا مظاہرہ کرتے ہوئے زائرین اور مہمانوں کے ساتھ خوش اخلاقی سے پیش آئیں اور ہر ممکن تعاون فراہم کریں تاکہ پُرامن ماحول برقرار رکھا جا سکے۔
قبل ازیں ایکٹنگ ڈی پی او لوئر چترال اور دیگر افسران نے دیدار گاہ لٹکوہ اور دروشپ کا مشترکہ سیکیورٹی دورہ بھی کیا، جہاں داخلی و خارجی راستوں، سیکیورٹی پوائنٹس اور دیگر انتظامات کا جائزہ لیا گیا۔ اس موقع پر ایس ڈی پی او لٹکوہ احمد عیسیٰ، چترال سکاوٹس کے میجر اشرف، ایس ایچ او لٹکوہ، اسپیشل برانچ حکام، اسماعیلی ریجنل کونسل کے نمائندگان اور دیگر متعلقہ افسران بھی موجود تھے۔
پولیس حکام نے اس عزم کا اظہار کیا کہ لوئر چترال پولیس امن و امان برقرار رکھنے اور اہم شخصیات کے دوروں کے دوران فول پروف سیکیورٹی یقینی بنانے کے لیے تمام ممکنہ اقدامات اٹھا رہی ہے۔
