برفانی جھیلوں کے پھٹنے اور فلیش فلڈز کا خطرہ: چترال سمیت برف پوش علاقوں میں احتیاطی اقدامات کی ہدایت
پشاور (نمائندہ چترال ٹائمز) خیبر پختونخوا میں جاری موسمی حالات کے پیش نظر، پراونشل ڈیزاسٹر مینجمنٹ اتھارٹی (پی ڈی ایم اے) نے صوبے کے برف پوش پہاڑی علاقوں خصوصاً چترال اپر و لوئر، دیر اپر، سوات اور کوہستان اپر میں برفانی جھیلوں کے پھٹنے (GLOFs) اور فلیش فلڈز کے خطرے سے خبردار کیا ہے۔پی ڈی ایم اے نے متعلقہ ڈپٹی کمشنرز کو مراسلہ جاری کرتے ہوئے ہدایت کی ہے کہ انسانی جانوں، مال مویشی، انفراسٹرکچر اور فصلوں کو ممکنہ نقصان سے بچانے کے لیے تمام ضروری احتیاطی اقدامات بروقت کیے جائیں۔جاری کردہ ہدایات میں کہا گیا ہے کہ حساس علاقوں میں گلیشیئرز اور برفانی جھیلوں کی نگرانی اور مسلسل مانیٹرنگ کو یقینی بنایا جائے تاکہ بروقت خبر دار کیا جا سکے۔ متعلقہ اداروں کے درمیان بہتر رابطے قائم کرنا اور مقامی آبادی کو آگاہی فراہم کرنا بھی ان اہم اقدامات کا حصہ ہے۔