گلگت بلتستان کے عام انتخابات کا شیڈول جاری کردیا گیا، امیدوار 15 سے 22 دسمبر تک اپنے کاغذاتِ نامزدگی جمع کرا سکیں گے۔الیکشن کمیشن
گلگت (نمائندہ چترال ٹائمز ) چیف الیکشن کمشنر گلگت بلتستان راجہ شہباز خان (تمغہ شجاعت) نے گلگت بلتستان کے عام انتخابات 2026 کا شیڈول جاری کردیا ہے۔ ترجمان الیکشن کمیشن کے مطابق شیڈول الیکشن ایکٹ 2017 کے تحت جاری کیا گیا ہے، جس کے تمام مراحل کی کڑی نگرانی کی جائے گی۔
جاری پریس ریلیز میں کہا گیا ہے کہ شیڈول کے تحت ریٹرننگ افسران کی جانب سے پبلک نوٹس 15 دسمبر 2025 کو جاری ہوگا، جبکہ امیدوار 15 سے 22 دسمبر تک اپنے کاغذاتِ نامزدگی جمع کرا سکیں گے۔ نامزد امیدواروں کی فہرست 23 دسمبر کو جاری کی جائے گی اور کاغذات نامزدگی کی جانچ پڑتال 30 دسمبر تک مکمل کی جائے گی۔ ریٹرننگ افسران کے فیصلوں کے خلاف اپیلیں دائر کرنے کی آخری تاریخ 3 جنوری مقرر ہے، جبکہ اپیلٹ ٹریبونل 10 جنوری تک اپیلوں پر فیصلے کرے گا۔ نظرثانی شدہ فہرست 11 جنوری کو جاری کی جائے گی۔ امیدوار 12 جنوری تک نامزدگی واپس لینے کی درخواست دے سکتے ہیں اور اسی روز امیدواروں کی حتمی فہرست بھی جاری ہوگی۔ انتخابی نشانات 13 جنوری کو الاٹ کیے جائیں گے، جبکہ پولنگ 24 جنوری 2026 بروز ہفتہ ہوگی۔
پریس ریلیز کے مطابق یہ شیڈول عام نشستوں کے ساتھ ساتھ خواتین اور ٹیکنوکریٹس کی مخصوص نشستوں پر بھی لاگو ہوگا۔ الیکشن کمیشن نے کہا ہے کہ آزاد، شفاف اور منصفانہ انتخابات کے لیے تمام ضروری انتظامات کیے جا رہے ہیں اور عوام، سیاسی جماعتوں اور امیدواروں سے اپیل کی گئی ہے کہ ضابطہ اخلاق کی پابندی کریں اور پرامن انتخابی ماحول کے قیام میں اپنا کردار ادا کریں۔
واضح رہے کہ گلگت بلتستان کونسل، اسلام آباد کی اطلاع کے مطابق صدرِ پاکستان نے عام انتخابات کی تاریخ مقرر کی تھی، جس پر چیف الیکشن کمشنر نے 24 جنوری 2026 کو گلگت بلتستان اسمبلی کے عام انتخابات کے انعقاد کی سفارش کی تھی۔