گرم چشمہ روڈ تاحال بند، الو کی فصل خراب ہونے کا خدشہ، عمائدین علاقہ، روڈکلیئرنس پر کام تیزی سے جاری ہے، جلد کھول دیا جائیگا۔ ڈی سی لوئیر چترال
گرم چشمہ (نمائندہ چترال ٹائمز ) گرم چشمہ روڈ کی بندش کے 36گھنٹے پورے ہونے کے باوجود روڈ تاحال عام ٹریفک کے لئے بحال نہ ہوسکی۔ عینی شاہدین کے مطابق روڈ کی بحالی کے لئے کوئی خاطر خواہ کام ہوتا ہوا بھی نظر نہیں آرہا ہے۔ چترال سائیڈپر ایک ایکس کیویٹر بیلپھوک کے مقام پرانتہائی سست رفتاری سے کام کررہا ہے۔ کام کی رفتار سے اندازہ ہورہا ہے کہ اگلے کئی دن تک روڈ بحال نہ ہوسکے گا۔
علاقے کے لوگوں نے ہمارے نمائندے سے بات کرتے ہوئے کہا ہے کہ گرم چشمہ میں آلو کا سیزن چل رہا ہے اگر یہ آلو بروقت مارکیٹ تک ہیں پہنچایا گیا تو گرم چشمہ میں پڑے پڑے 24 گھنٹے میں سڑ جائے گا۔ جس سے علاقے کے غریب لوگوں کا پورے سال کا سرمایہ ڈوب جائے گا۔
علاقے کے لوگوں نے انتظامیہ سے اپیل کی ہے کہ اس مہنگائی کے دور میں ان کے لئے آلو کی پیداوار سے حاصل شدہ رقم موت اور زندگی کا فیصلہ کرتی ہے۔ اس لئے جلد سے جلد گرم چشمہ روڈبحال کیا جائے تاکہ لوگ تیار فصل خراب ہونے سے قبل منڈیوں تک پہنچا سکیں۔ اس حوالے سے ڈپٹی کمشنر لوئیر چترال کا کہنا ہے کہ گرم چشمہ روڈ پر متعدد مقامات پر سیلاب آیا ہے جہاں کل سے مشینری لگادی گئی ہے اور دونوں اطراف کام جاری ہے جس کی نگرانی اسسٹنٹ کمشنرز کررہے ہیں بہت جلد ٹریفک بحال کیاجائیگا،
