پہلی مرتبہ تریچمیر بیس کیمپ تک ٹریکنگ کیلئے ٹریکرزچترال سے روانہ، روانگی کے موقع پر مقامی ہوٹل میں تقریب اور میڈیا بریفنگ، سابق ممبر صوبائی اسمبلی بی بی فوزیہ کی میڈیا ٹاک
تریچ میر سمٹ سے صوبہ کی سیاحت فروغ پائے گی، بی بی فوزیہ
پہلی بار خیبرپختونخوا میں چوٹی تریچ میر کو سرکاری سطح پر سمٹ کرنے کیلئے حکومت نے اقدام کیا،مستقبل میں غیر ملکی کوہ پیماء چوٹی سر کیلئے پاکستان کا رخ کرینگے، سابقہ ممبر صوبائی اسمبلی
چترال ( نمائندہ چترال ٹائمز) سابقہ ممبر صوبائی اسمبلی و ممبر بورڈ آف ڈائریکٹرز خیبرپختونخوا کلچر اینڈ ٹورازم اتھارٹی بی بی فوزیہ نے کہا ہے کہ تریچ میر سمٹ اور بیس کیمپ تک ٹریکنگ سے نہ صرف نئے کوہ پیماؤں کو مستقبل میں موقع ملے گا بلکہ خیبرپختونخوا اور خصوصاً چترال کی معیشت مستحکم ہوگی۔ تریچ میر ٹریکنگ کیلئے 20 افراد پر مشتمل گروپ روانہ ہوگیا جس میں خیبرپختونخوا سمیت اسلام آباد، پنجاب اور دیگر علاقوں سے ٹریکرز شریک ہیں۔
ان خیالات کا اظہار انہوں نے خیبرپختونخوا کلچر اینڈ ٹورازم اتھارٹی کے زیر اہتمام تریچ میر ٹریکنگ کی افتتاحی تقریب کے موقع پر میڈیا سے گفتگو کرتے ہوئے کیا۔ اس موقع پر ڈائریکٹر ایڈمن اینڈ فنانس عمر ارشد خان، منیجر ایونٹس محمد علی سید، خطیب شاہی مسجد مولانا خلیق الزمان، تریچ میر بیک پیکرز کلب کے عہدیداران، ٹریکرز اور صحافی برادری بھی موجود تھی۔ بی بی فوزیہ نے گفتگو کرتے ہوئے مزید کہاکہ وزیراعلی خیبرپختونخوا علی امین گنڈاپور کی ذاتی دلچسپی اور ہدایات پر تریچ میر سمٹ اور ٹریکنگ کا انعقاد گیا ہے۔
تریچ میر سمٹ کا پلان خیبرپختونخوا کلچر اینڈ ٹورازم اتھارٹی نے پیش کیا اور اسے جامع منصوبہ بندی سے ترتیب دیا گیا جس سے مقامی کمیونٹی اور افراد کو فائدہ ہوگا۔ تین گروپ مختلف مراحل میں تریچ میر ٹریکنگ کرینگے جس میں خواتین ٹریکرز بھی شامل ہیں۔ پہلی بار خیبرپختونخوا میں ہندوکش پہاڑی سلسلے کی بلند ترین چوٹی تریچ میر کو سرکاری سطح پر سمٹ کرنے کیلئے حکومت نے قدم اٹھایا ہے اور اس اقدام سے مستقبل میں نہ صرف غیر ملکی کوہ پیماء بلکہ پاکستان سے بھی کوہ پیماء تریچ میر چوٹی کا رخ کرینگے۔اس سمٹ اور ٹریکنگ کیلئے 500 سے زائد خواتین اور 100 سے زائد خواتین نے اپلائی کیا تھا۔ ڈائریکٹر ایڈمن اینڈ فنانس عمر خان نے کہا کہ ہمیں خوشی ہے کہ کثیر تعداد میں نوجوانوں نے سمٹ کیلئے اپلائی کیا اور یہ نوجوان ٹریکنگ کے دوران شجر کاری مہم میں بھی حصہ لینگے اور مختلف مقامات پر پودے لگائے جائینگے۔
