چترال: شاہی مسجد روڈ پر واقع مارکیٹ میں آتشزدگی، ہوٹل سمیت 6 دکانوں میں موجود سامان جل کر خاکستر، لاکھوں روپے کا نقصان
.
چترال (نمائند چترال ٹائمز) گزشتہ شب چترال ٹاؤن میں شاہی مسجد کے قریب واقع ایک مارکیٹ میں اچانک آگ بھڑک اٹھی جس نے دیکھتے ہی دیکھتے ہوٹل اور چھ دکانوں کو اپنی لپیٹ میں لے لیا۔ آتشزدگی کے نتیجے میں لاکھوں روپے مالیت کا قیمتی سامان جل کر راکھ ہو گیا، تاہم ریسکیو 1122 اور ٹی ایم اے کی ٹیموں نے بروقت کارروائی کرتے ہوئے پوری مارکیٹ کو مکمل تباہی سے بچا لیا۔
تفصیلات کے مطابق آگ گزشتہ شب شاہی مسجد سے ملحقہ مارکیٹ میں آگ لگی۔ اطلاع ملتے ہی ریسکیو 1122 کی فائر فائٹرز ٹیم تین فائر وہیکلز کے ساتھ موقع پر پہنچی۔ ٹی ایم اے کے فائر برگیڈ اہلکاروں نے بھی امدادی کارروائیوں میں بھرپور حصہ لیا۔ فائر فائٹرز نے ڈیڑھ گھنٹے کی مسلسل جدوجہد اور تقریباً 30 ہزار لیٹر پانی استعمال کرنے کے بعد آگ پر مکمل قابو پا کر اسے مزید پھیلنے سے روک دیا۔
آتشزدگی کے نتیجے میں ایک ہوٹل اور چھ دکانیں جن میں کلاتھ ہاؤس، بوٹ ہاؤس اور کباڑ کی دکان شامل ہیں، ان میں موجود تمام سامان جل کر خاکستر ہو گیا ہے۔ دکانداروں کے مطابق نقصان کی مالیت لاکھوں میں ہے۔ ریسکیو ذرائع کا کہنا ہے کہ بروقت فائر فائٹنگ کی وجہ سے مارکیٹ کی دیگر درجنوں دکانیں متاثر ہونے سے بچ گئیں، جس سے مزید لاکھوں روپے کے نقصان کا خدشہ ٹل گیا۔
ابتدائی اطلاعات کے مطابق آگ لگنے کی وجہ معلوم نہ ہوسکی، تاہم خدشہ ظاہر کیا جارہا ہے کہ شارٹ سرکٹ کی وجہ سے آگ بھڑک اُٹھی ہے۔ متاثرہ تاجروں نے ضلعی انتظامیہ اور حکومت سے مطالبہ کیا ہے کہ ان کے مالی نقصان کا ازالہ کیا جائے تاکہ وہ دوبارہ اپنا کاروبار کھڑا کر سکیں۔
یہاں یہ بات قابل ذکر ہے کہ مذکورہ دکانین چند ماہ پہلے کھولے گئے تھے جبکہ دو دکانوں میں چند دن پہلے کاروبار شروع کیا گیا تھا، جوجل کر خاکستر ہوگئے ۔
دریں اثنا ڈپٹی کمشنر لوئر چترال، راؤ ہاشم عظیم نے اسسٹنٹ کمشنر اور متعلقہ لائن ڈیپارٹمنٹس کے افسران کے ہمراہ آتشزدگی سے متاثرہ ہوٹل اور دکانوں کا دورہ کیا اور امدادی و انتظامی اقدامات کا جائزہ لیا۔ انہوں نے متاثرین سے ملاقات کر کے واقعے پر گہرے افسوس کا اظہار کیا۔
ڈپٹی کمشنر نے ہدایات کیں کہ سول ڈیفنس اور ریسکیو 1122 کی نگرانی میں تمام کاروباری مراکز میں فائر ایکسٹنگوئشرز اور دیگر حفاظتی آلات کی دستیابی یقینی بنائی جائے، جبکہ تاجر برادری کے تعاون سے فائر سیفٹی سے متعلق آگاہی سیشنز اور تربیتی پروگرامز منعقد کیے جائیں۔
انہوں نے ریسکیو 1122 اور فائر فائٹنگ ٹیم کی بروقت کاروائی کو سراہتے ہوئے کہا کہ ان کی مؤثر حکمتِ عملی سے بڑے جانی و مالی نقصان سے بچاؤ ممکن ہوا۔ ڈپٹی کمشنر کہا کہ کہ واقعے کی وجوہات کا ضابطے کے مطابق تعین کر کے ضلع بھر میں فائر سیفٹی ایس او پیز پر سختی سے عملدرآمد یقینی بنایا جاۓ۔
