سوشل میڈیا پر نفرت انگیز مواد شیئر کرنے پرڈی پی او کافوری ایکشن، نوجوان ضلع بدر جبکہ پولیس اہلکار معطل،
چترال ( نمائندہ چترال ٹائمز ) گزشتہ دنوں سوشل میڈیا پر ایک ویڈیو وائرل ہوئی، جس میں ایک نوجوان لڑکے کی جانب سےکالاش کمیونٹی کی بچیوں کے بارے میں نازیبا الفاظ استعمال کیے گئے۔
ڈسٹرکٹ پولیس آفیسر لوئر چترال رفعت اللہ خان نے وائرل ویڈیو کا فوری نوٹس لیتے ہوئے ایک خصوصی انکوائری کمیٹی تشکیل دی۔
انکوائری کمیٹی کے اراکین نے ویڈیو میں نازیبا زبان استعمال کرنے والے نوجوان اور دیگر متعلقہ افراد کے بارے میں اپنی رپورٹ ڈی۔پی۔او لوئر چترال کو پیش کی۔
پریس ریلیز میں کہا گیا ہے کہ ڈی۔پی۔او لوئر چترال نے موصولہ رپورٹ کی روشنی میں ضلعی انتظامیہ کے تعاون سے ویڈیو میں نازیبا الفاظ استعمال کرنے والے نوجوان کو 3 ایم پی او کے تحت ضلع بدر کرکے جیل منتقل کروا دیا، جبکہ آن ڈیوٹی کانسٹیبل کو معطل کرکے اس کے خلاف محکمانہ کارروائی کا آغاز کر دیا گیا ہے نیز دیگر ذمہ داران بشمول سوشل میڈیا پیجز جو اس واقعے میں ملوث پائے جائیں گے ان کے خلاف بھی سخت قانونی کاروائی کی جائیگی۔
جاری پریس ریلیز کے مطابق ڈسٹرکٹ لوئر چترال پولیس تمام ایسے افراد کو متنبہ کرتی ہے جو سوشل میڈیا پر نفرت انگیز، توہین آمیز یا اشتعال انگیز ویڈیوز اپلوڈ یا وائرل کرنے، کسی گروہ یا مخصوص مسلک کو نشانہ بنانے، بغیر تحقیق کے مواد پھیلانے، نیز جعلی آئی ڈیز، گروپس اور پیجز چلانے والے ایسے تمام افراد کے خلاف سائبر کرائم ایکٹ کے تحت سخت کارروائی عمل میں لائی جائے گی۔