اپر چترال: ڈسٹرکٹ اینڈ سیشن جج کے زیر صدارت ترقیاتی منصوبوں پر پیش رفت کا جائزہ اجلاس، متعلقہ اداروں کو کام تیز کرنے کی ہدایت
۔
اپر چترال (نمائندہ چترال ٹائمز) ڈسٹرکٹ اینڈ سیشن جج میاں محمود کی زیرِ صدارت ضلع اپر چترال میں جاری ترقیاتی منصوبوں پر پیش رفت کا جائزہ لینے کے لیے ایک اہم اجلاس منعقد ہوا۔
اجلاس میں ڈپٹی کمشنر اپر چترال محمد عمران خان، ڈسٹرکٹ پولیس آفیسر، ایگزیکٹو انجینئر سی اینڈ ڈبلیو، تحصیل میونسپل آفیسر مستوج و موڑکہو، محکمہ پبلک ہیلتھ، محکمہ ایریگیشن کے نمائندگان، متعلقہ افسران اور ٹھیکہ داروں نے شرکت کی۔
اجلاس میں کورٹ پراجیکٹس بونی و مستوج، سی بی ایم ایس روڈ، بونی بوزند روڈ، موڑکہو روڈ اور عدالتی عمارتوں کے ڈرینیج سسٹم سے متعلق جاری منصوبوں پر تفصیلی غور کیا گیا۔
ڈسٹرکٹ اینڈ سیشن جج نے متعلقہ محکموں اور ٹھیکہ داروں کو ہدایت کی کہ تمام منصوبے مقررہ مدت کے اندر اعلیٰ معیار کے ساتھ مکمل کیے جائیں۔ انہوں نے سی بی ایم ایس روڈ پر فوری عملی کام شروع کرنے اور جہاں کمپیکشن مکمل ہوچکی ہے وہاں اسفالٹ بچھانے کی ہدایت بھی جاری کی۔
اجلاس میں محکمہ سی اینڈ ڈبلیو کو بونی بوزند اور موڑکہو روڈ پر تعمیراتی سرگرمیوں میں مزید تیزی لانے کی ہدایت دی گئی، جبکہ کورٹ پراجیکٹس کی بروقت تکمیل پر خصوصی زور دیا گیا۔
ڈپٹی کمشنر اپر چترال نے بھی متعلقہ اداروں کو اجلاس میں جاری کردہ ہدایات پر فوری عملدرآمد اور منصوبوں کی باقاعدہ پراگریس رپورٹس جمع کرانے کی تاکید کی تاکہ ترقیاتی کام مؤثر اور بروقت مکمل کیے جا سکیں۔
