ڈپٹی کمشنر لوئیر چترال کا گلاف کے ممکنہ خطرے کے پیش نظر انتظامات کا جائزہ لینے مدک لشٹ کا دورہ ، گلاف کے حوالے سے اگہی سیشن کا اہتمام
چترال ( نمائندہ چترال ٹائمز ) گلیشیئل لیک آؤٹ برسٹ فلڈ (GLOF) کے ممکنہ خطرے کے پیش نظر، ضلعی انتظامیہ لوئر چترال کی جانب سے فوری حفاظتی اقدامات کیۓ گۓ ہیں۔ اس سلسلے میں ڈپٹی کمشنر لوئر چترال، راؤ ہاشم عظیم، نے ایڈیشنل ڈپٹی کمشنر جنرل عبدالسلام کے ہمراہ مدکلشٹ کا دورہ کیا تاکہ امدادی سرگرمیوں کی ذاتی طور پر نگرانی کر سکیں۔
مدکلشٹ اور شیشی کوہ کے علاقوں میں حفاظتی کیمپ قائم کر دیے گئے ہیں اور مقامی آبادی کو بحفاظت ان کیمپس میں منتقل کر دیا گیا ہے۔
ڈپٹی کمشنر نے اپنی ٹیم کے ساتھ 3’4گھنٹے کا طویل مسافت پیدل طے کر کے مدکلشٹ کے دور دراز چراگاہوں , بے بند اور پڑاو کے علاقوں کا دورہ کیا۔ ساری رات فیلڈ میں خود موجود رہۓ تاکہ وہاں موجود افراد میں گلاف کے خطرے کے بارے میں آگاہی پیدا کی جا سکے اور ان کے انخلا میں مدد کی جا سکے۔
حفاظتی کیمپوں میں منتقل ہونے والے افراد کو مفت طبی سہولیات، خوراک اور دیگر تمام بنیادی ضروریات فراہم کی جا رہی ہیں۔ ڈپٹی کمشنر نے کیمپس کا دورہ کر کے تمام انتظامات کا جائزہ لیا۔کیمپ میں مقیم افراد سے مسائل اور سہولیات کی فراہمی کے حوالے سے دریافت کیا۔
ڈپٹی کمشنر نے ضلعی انتظامیہ، پاک فوج، لیویز، پولیس،آغاخان ایجنسی فارہیبٹاٹ AKAH، ریسکیو 1122، SIF اور دیگر تمام متعلقہ محکموں کے اہلکاروں کی کاوشوں کو سراہا اور انہیں ہنگامی صورتحال سے نمٹنے کے لیے ہر وقت تیار رہنے کی ہدایت کی۔
ڈپٹی کمشنر نے عوام سے اپیل کی ہے کہ وہ ان مشکل حالات میں احتیاطی تدابیر اختیار کریں، محفوظ مقامات پر قیام کریں اور دریاؤں اور ندی نالوں کے قریب جانے سے گریز کریں۔
دریں اثنا ڈپٹی کمشنر لوئر چترال راؤ ہاشم عظیم کی زیر صدارت مدکلشٹ میں گلاف (Glacial Lake Outburst Flood) کے ممکنہ خطرات کے حوالے سے عوام کے لیے ایک آگاہی سیشن منعقد کیا گیا۔ اس سیشن میں متعلقہ سرکاری اداروں کے افسران اور مقامی آبادی نے بڑی تعداد میں شرکت کی۔ اس سیشن کا بنیادی مقصد مقامی لوگوں کو گلاف کے ممکنہ خطرات سے آگاہ کرنا اور انہیں اس سے محفوظ رہنے کے لیے ضروری احتیاطی تدابیر کے بارے میں بتانا تھا۔
ڈپٹی کمشنر نے عوام کو ہنگامی حالات میں محفوظ مقامات پر منتقل ہونے اور ایک دوسرے کو بروقت اطلاع دینے کی اہمیت پر زور دیا۔ انہوں نے کہا کہ مشکل کی اس گھڑی میں ایک دوسرے کی مدد کرنا اور ٹیم ورک کی صورت میں کام کرنا ہی اس خطرے سے نکلنے کا واحد راستہ ہے۔ گلاف کے ممکنہ خطرات کے پیش نظر مڈکلشٹ , گولین اور ارکاری میں عوام کو محفوظ مقامات پر قائم کیمپس میں منتقل کردیا گیا ہے۔
ڈپٹی کمشنر نے عوام کو ہدایت کی کہ گلاف کا خطرہ ٹل جانے تک محفوظ مقامات پر قائم کیے گئے کیمپس میں رہائش اختیار کریں۔ ہنگامی صورتحال میں متعلقہ اداروں کے ساتھ مکمل تعاون کریں۔ ایک دوسرے کو بروقت معلومات فراہم کریں۔ افواہوں پر کان نہ دھریں اور صرف مستند ذرائع سے حاصل ہونے والی معلومات پر یقین کریں۔ اس سیشن کے اختتام پر مقامی افراد نے ڈپٹی کمشنر اور متعلقہ اداروں کے افسران کا شکریہ ادا کیا اور یقین دلایا کہ وہ حکومتی ہدایات پر مکمل عمل کریں گے۔
