ڈپٹی کمشنر لوئیر چترال کی ہدایت پر بہتر رہائشی سہولیات کی فراہمی کے حوالے سے ہاسٹلز کیلئے قواعد و ضوابط جاری، سختی سے عمل درآمد کی ہدایت
چترال (نمائندہ چترال ٹائمز ) ڈپٹی کمشنرلویر چترال راوہاشم عظیم کی خصوصی ہدایت پر، طلباء و طالبات کی حفاظت اور بہتر رہائشی سہولیات کی فراہمی کے لیے ہاسٹلز کے لیے نئے قواعد و ضوابط جاری کیے گئے ہیں۔ قواعد وضوابط کے مطابق رہائشی عمارت میں ہاسٹل چلانے کی اجازت نہیں ہوگی۔ ہاسٹل کے لیے الگ عمارت کا ہونا لازمی قراردیا گیاہے۔ہر ہاسٹل میں کم از کم 5 کمرے ہونا ضروری ہیں۔ہاسٹلز کے داخلی و خارجی راستوں پر سی سی ٹی وی کیمرے نصب کرنا اور 24 گھنٹے سیکیورٹی گارڈ کا ہونا لازمی ہے۔ہاسٹل کا نام اور تمام قواعد و ضوابط ایک نمایاں سٹینڈرڈ بورڈ پر آویزاں کیاجانا لازمی قراردیاگیا ہے۔ ڈی سی آفس سے جاری شدہ پریس ریلیز کے مطابق 20 اگست 2025 کے بعد ان قواعد کی خلاف ورزی کی صورت میں ہاسٹل سیل کرکے مالک کے خلاف ایف آئی آر درج کی جائے گی۔
دریں اثنا مختلف مکاتب فکر نے ڈپٹی کمشنر لوئیر چترال کی کاوشوں کو سراہتے ہوئے کہا ہےکہ ہوسٹلز کی قیام کے لئے قواعد وضوابط نہ ہونے کے باعث ہر ، کوئی اس کاروبار میں کود گیا تھاجبکہ بعض ہوسٹلز میں بچوں اورخصوصا بچیوں کےلئے بنیادی سہولیات تک میسر نہیں تھے اورساتھ سیکورٹی کے مسائل الگ تھے۔