ڈپٹی کمشنر لوئیر چترال کا ایک اور احسن اقدام، ڈسٹرکٹ جیل لوئر چترال میں پہلی مرتبہ ڈرگ ری ہیبیلیٹیشن سینٹر کا افتتاح
چترال ( نمائندہ چترال ٹائمز ) ڈپٹی کمشنر لوئر چترال، راؤ ہاشم عظیم نے ڈسٹرکٹ جیل لوئر چترال میں پہلی مرتبہ ڈرگ ری ہیبیلیٹیشن سینٹر کا باقاعدہ افتتاح کیا۔ افتتاحی تقریب میں پولیس افسران، اور ضلعی انتظامیہ کے افسران بھی موجود تھے۔
افتتاحی تقریب سے خطاب کرتے ہوئے ڈپٹی کمشنر نے کہا کہ منشیات کا بڑھتا ہوا استعمال نوجوان نسل کے مستقبل کو شدید خطرات سے دوچار کر رہا ہے اور اس چیلنج سے نمٹنے کے لیے مربوط اور مؤثر اقدامات وقت کی اہم ضرورت ہیں۔
انہوں نے مزید کہا کہ ڈرگ ری ہیبیلیٹیشن سینٹر کی بدولت نشے کے عادی قیدیوں کو نہ صرف جدید طبی سہولیات فراہم کی جائیں گی بلکہ انہیں نفسیاتی اور سماجی معاونت کے ذریعے ایک نئی زندگی شروع کرنے میں مدد دی جائے گی۔ یہ مرکز قیدیوں کی بحالی اور انہیں معاشرے کا صحت مند اور مفید شہری بنانے میں کلیدی کردار ادا کرے گا۔
ڈپٹی کمشنر نے اس اقدام کو علاقے میں منشیات کے خاتمے اور متاثرہ افراد کی عملی بحالی کے لیے ایک اہم سنگ میل قرار دیا۔ قبل ازیں جیل سپرنٹنڈنٹ ریاض احمد نے قیدیوں ودیگر امور سے متعلق ڈپٹی کمشنر کو بریفنگ دی۔
دریں اثنا چترال کے مختلف مکاتب فکر نے ڈپٹی کمشنر کی اس اقدام کو سراہتے ہوئے کہا ہے کہ پہلی مرتبہ کسی نے اس اہم معاشرتی برائی کو ختم کرنے اور متاثرہ افراد کو دوبارہ معاشرے کا ایک مفید فرد بنانے کیلئے قدم اُٹھایا ہے جو کہ انتہائی خوش آئند ہے ،
