اپرچترال؛ گورنمنٹ ہائی سکول شونگوش میں طلحہ محمود فاؤنڈیشن کی جانب سے جدید کمپیوٹر لیب کا قیام اور افتتاح
.
اپرچترال ( نمائندہ چترال ٹائمز ) ضلع اپر چترال کے دورآفتادہ اور پسماندہ علاقہ اویر کے گورنمنٹ ہائی سکول شونگوش میں محمد طلحہ محمود فاؤنڈیشن کے تعاون سے جدید سہولیات سے آراستہ کمپیوٹر لیب کا قیام عمل میں لایا گیا۔
افتتاحی تقریب میں علاقے کے معززین، اساتذہ، طلبہ اور والدین کی بڑی تعداد نے شرکت کی۔ کمپیوٹر لیب کا افتتاح فاؤنڈیشن کے اپر چترال کے کوآرڈینیٹر سید نزاکت حسین شاہ نے کیا۔
اس موقع پر مقررین نے کہا کہ جدید ٹیکنالوجی کی تعلیم موجودہ دور کی اہم ضرورت ہے، اور اس لیب کے قیام سے علاقے کے طلبہ و طالبات کو جدید تعلیمی سہولیات میسر آئیں گی، جو ان کی صلاحیتوں کو نکھارنے میں اہم کردار ادا کریں گی۔
شرکاء نے محمد طلحہ محمود کا خصوصی شکریہ ادا کیا، جن کی سرپرستی میں فاؤنڈیشن پسماندہ علاقوں میں تعلیمی سہولیات کی فراہمی کے لیے عملی اقدامات کر رہی ہے۔
تقریب کے اختتام پر طلبہ نے فاؤنڈیشن کے نمائندگان کا شکریہ ادا کرتے ہوئے اس عزم کا اظہار کیا کہ وہ اس کمپیوٹر لیب سے بھرپور استفادہ کریں گے اور اپنے علاقے اور ملک کی ترقی میں مثبت کردار ادا کریں گے۔
