وزیر اعلیٰ خیبرپختونخوا محمد سہیل آفریدی نے کرپشن کی اطلاع اور شکایات کے اندراج کے لیے وزیر اعلیٰ کمپلینٹ سیل میں اینٹی کرپشن ڈیسک کا افتتاح کر دیا
۔
پشاور ( نمائندہ چترال ٹائمز ) وزیر اعلیٰ خیبرپختونخوا محمد سہیل آفریدی نے کرپشن کی اطلاع اور شکایات کے اندراج کے لیے وزیر اعلیٰ کمپلینٹ سیل میں اینٹی کرپشن ڈیسک کا افتتاح کر دیا ہے۔ شہری اب براہ راست وزیر اعلیٰ خیبرپختونخوا کو کرپشن سے متعلق شکایات درج کرا سکتے ہیں۔کرپشن سے متعلق شکایات کے اندراج کے لیے خصوصی نمبر 091-9222451 جاری کر دیا گیا ہے جس پر شہری رابطہ کر سکتے ہیں۔ اس کے علاوہ زمونگ کور اور پناہ گاہوں میں مقیم افراد کے لیے بھی خصوصی شکایت ڈیسک قائم کر دیا گیا ہے تاکہ انہیں بھی اپنی شکایات کے اندراج اور ازالے کے لیے موثر پلیٹ فارم میسر آ سکے۔
وزیر اعلیٰ محمد سہیل آفریدی نے وزیر اعلیٰ سیکرٹریٹ میں قائم کمپلینٹ سیل کا دورہ کیا، جہاں انہوں نے شہریوں سے براہ راست رابطہ کیا، ان کی شکایات سنیں اور شکایات کے ازالے سے متعلق فیڈ بیک بھی لیا۔ اس موقع پر وزیر اعلیٰ نے کہا کہ میں نے عوام سے وعدہ کیا تھا کہ آپ کی ہر شکایت کا ازالہ ہوگا۔آج ہم اپنے وعدے کے عملی ثبوت عوام کے سامنے پیش کر رہے ہیں۔ وزیر اعلیٰ نے مزید کہا کہ انتظامی یا مالی بے ضابطگی رپورٹ کرنے والا ہر شہری وزیر اعلیٰ کو اپنے ساتھ کھڑا پائے گا۔ عوام شکایت درج کرائیں، حکومت اس پر عملدرآمد یقینی بنائے گی۔
وزیر اعلیٰ نے کہا کہ بانی چیئرمین عمران خان کے وژن کے مطابق قائم سی ایم کمپلینٹ سیل کو مزید موثر بنایا جا رہا ہے۔ واٹس ایپ، ای میل، فیس بک اور ایکس کے ذریعے بھی شکایات درج کرائی جا سکیں گی جبکہ موبائل رکھنے والا ہر شہری اپنی شکایت براہ راست درج کرا سکے گا۔محمد سہیل آفریدی نے واضح کیا کہ عوامی شکایات کی نگرانی خود کروں گا اور شکایات کا ازالہ خود یقینی بناوں گا۔ عوام کے احساس کو نہ کم ہونے دیں گے اور نہ کسی کو زیادتی کی اجازت دیں گے۔ ہر شکایت کو اپنا ذاتی مسئلہ سمجھ کر حل کریں گے۔انہوں نے کہا کہ عوام مایوس نہ ہوں، حکومت ان کے ساتھ کھڑی ہے۔ ہمارا واحد مفاد اور ترجیح عوام کی فلاح و بہبود ہیں۔
خیبرپختونخوا میں صرف وہی پالیسیاں نافذ ہوں گی جو عوام کے مفاد میں ہوں گی جبکہ صوبے کے مفاد اور عوامی اعتماد کو ہر فیصلے میں مقدم رکھا جائے گا۔بعد ازاں وزیر اعلیٰ نے کمپلینٹ سیل کے عملے کو ہدایت کی کہ وہ شکایت گزاروں کے ساتھ اچھا رویہ اختیار کریں اور ان کی شکایات کے فوری حل کو یقینی بنائیں۔