وزیر اعلیٰ خیبر پختونخواکا صوبہ بھر میں زیر التوا ایک لاکھ سترہ ہزار سے زائد ڈرائیونگ لائسنس کارڈز کی پرنٹنگ کا عمل ایک ماہ کے اندر مکمل کرنے کی ہدایت
پشاور ( نمائندہ چترال ٹائمز ) وزیر اعلیٰ خیبر پختونخوا محمد سہیل آفریدی نے صوبہ بھر میں زیر التوا ایک لاکھ سترہ ہزار سے زائد ڈرائیونگ لائسنس کارڈز کی پرنٹنگ کا عمل ایک ماہ کے اندر مکمل کرنے کی ہدایت کی ہے۔ اس ضمن میں محکمہ ٹرانسپورٹ خیبر پختونخوا نے ڈرائیونگ لائسنس کارڈز کی پرنٹنگ اور ترسیل کے لیے ضلعی بنیادوں پر باقاعدہ شیڈول بھی جاری کر دیا ہے، جس کے تحت متعلقہ حکام کو پابند کیا گیا ہے کہ وہ طے شدہ تاریخوں کے مطابق لائسنس کارڈز کی بروقت ترسیل کو ہر صورت یقینی بنائیں۔
جاری کردہ شیڈول کے مطابق ہزارہ ڈویژن میں ڈرائیونگ لائسنس کارڈز کی پرنٹنگ کا عمل جنوری 2026 کے پہلے ہفتے میں مکمل کر لیا جائے گا، جبکہ مالاکنڈ ڈویژن میں سوات، دیر اور بونیر کے زیر التوا ڈرائیونگ لائسنس کارڈز جنوری 2026 کے وسط تک شہریوں کو فراہم کر دیے جائیں گے۔ اسی طرح پشاور ڈویژن میں ڈرائیونگ لائسنس کارڈز کی ترسیل 23 سے 26 جنوری 2026 کے دوران مکمل کرنے کا ہدف مقرر کیا گیا ہے، جبکہ کوہاٹ ڈویژن میں یہ عمل 29 جنوری 2026 تک مکمل ہونے کی توقع ہے۔ بنوں ڈویژن کے شہریوں کو ڈرائیونگ لائسنس کارڈز 30 جنوری 2026 تک فراہم کر دیے جائیں گے، جبکہ مردان اور ڈی آئی خان ڈویژن میں بھی زیر التوا ڈرائیونگ لائسنس کارڈز کی ترسیل 30 جنوری 2026 تک مکمل کرنے کی ہدایت کی گئی ہے۔
وزیر اعلیٰ نے واضح کیا ہے کہ عوامی خدمات کی بروقت اور مو ¿ثر فراہمی موجودہ صوبائی حکومت کی اولین ترجیح ہے اور اس ضمن میں کسی قسم کی کوتاہی یا غفلت ہرگز برداشت نہیں کی جائے گی۔ انہوں نے متعلقہ محکموں کو ہدایت کی کہ شہریوں کو درپیش مشکلات کے ازالے کے لیے تمام وسائل بروئے کار لائے جائیں اور اس بات کو یقینی بنایا جائے کہ برسوں سے زیر التوا ڈرائیونگ لائسنس کارڈز مقررہ مدت کے اندر عوام تک پہنچیں۔ وزیر اعلیٰ کا کہنا تھا کہ انتظامی کارکردگی میں بہتری اور عوامی اعتماد کی بحالی کے لیے ایسے عملی اقدامات ناگزیر ہیں اور صوبائی حکومت عوام کو سہولیات کی فراہمی کے اپنے عزم پر کسی صورت سمجھوتہ نہیں کرے گی۔