وزیراعلیٰ خیبرپختونخوا محمد سہیل آفریدی نے لوئردیر میں نو تعمیر شدہ 40.8 میگاواٹ کوٹو ہائیڈرو پاور پراجیکٹ کا افتتاح کیا
تمرگرہ ( نمائندہ چترال ٹائمز ) وزیر اعلیٰ خیبر پختونخوا محمد سہیل آفریدی نے ہفتہ کے روز ضلع لوئر دیر کا دورہ کیا جہاں انہوں نے نو تعمیر شدہ 40.8 میگاواٹ کوٹو ہائیڈرو پاور پراجیکٹ کا افتتاح کیا۔کوٹو ہائیڈرو پاور پراجیکٹ 21.7 ارب روپے کی لاگت سے تعمیر کیا گیا ہے جس سے سالانہ 207 ملین یونٹس بجلی پیدا ہوگی جبکہ منصوبے سے سالانہ 2.4 ارب روپے آمدن متوقع ہے۔ محمد سہیل آفریدی نے 1.5 ارب روپے کی لاگت سے تعمیر ہونے والے 18.5 کلومیٹر طویل تورمنگ رازگرام روڈ کا بھی افتتاح کیا۔
افتتاح کی تقریب سے خطاب کرتے ہوئے وزیر اعلیٰ نے کہا کہ صوبائی حکومت پن بجلی وسائل کو معاشی ترقی کی بنیاد بنانے کیلئے طویل المدتی منصوبہ بندی کے تحت کام کر رہی ہے۔ صاف اور سستی توانائی کے یہ منصوبے روزگار کے فروغ اور صنعتی ترقی میں اہم کردار ادا کریں گے۔ انہوں نے مزید کہا کہ صوبے کی پہلی پاور ٹرانسمشن لائن بچھائی جا رہی ہے جس کے ذریعے 11 مقامی بجلی گھروں سے پیدا ہونے والی بجلی کی ترسیل ممکن بنائی جائے گی۔
وزیر اعلیٰ کا کہنا تھا کہ مقامی پاور ہاوسز سے پیدا ہونے والی بجلی صنعتوں کو رعائتی نرخوں پر فراہم کی جائے گی کیونکہ صنعتی شعبے کی ترقی سے ہی بے روزگاری کا خاتمہ ممکن ہے۔ وزیر اعلیٰ کا کہنا تھا کہ صوبائی حکومت اپنے پاور ڈسٹری بیوشن سسٹم کیلئے بھی مکمل سپورٹ فراہم کرے گی۔صوبے کے قدرتی وسائل پر پہلا حق یہاں کے عوام کا ہے۔ افسوس ہے کہ صوبے میں ترقیاتی منصوبوں پر کام کرنے والے غیر ملکی انجینئرز کے خیبر پختونخوا دورے کیلئے این او سی جاری نہیں ہو رہی جس کے باعث اربوں روپے مالیت کے اہم منصوبے تاخیر کا شکار ہو رہے ہیں جو صرف خیبرپختونخوا کا نہیں بلکہ پورے ملک کا نقصان ہے۔
وزیر اعلیٰ نے مزید کہا کہ ” عمران خان کے دل میں عوام کا درد ہے، ان کے شروع کردہ تمام منصوبے دیکھ کر فخر محسوس کرتا ہوں کیونکہ عمران خان نے منصوبے عوام کیلئے شروع کیے، یہ سوچے بغیر کہ افتتاح کے وقت حکومت کس کی ہوگی”. وزیر اعلیٰ کا کہنا تھا کہ خیبر پختونخوا کے 3 ہزار ارب روپے وفاق کے ذمے واجب الادا ہیں جو سالوں سے ادا نہیں کیے جا رہے۔ صوبائی صدر پی ٹی آئی جنید اکبر اور دیر سے منتخب اراکین قومی و صوبائی اسمبلی بھی تقریب میں موجود تھے۔
