وزیراعلیٰ خیبرپختونخوا نے پشاور بیوٹیفیکشن منصوبے کا افتتاح کردیا، روڈ انفراسٹرکچر کی بحالی، سٹریٹ لائٹس ودیگر اقدامات منصوبے میں شامل
پشاور ( نمائندہ چترال ٹائمز ) وزیر اعلیٰ خیبر پختونخوا محمد سہیل آفریدی نے صوبائی دارالحکومت پشاور کی عظمت رفتہ کی بحالی کے لیے عملی قدم اٹھاتے ہوئے اتوار کے روزپشاور بیوٹیفیکیشن منصوبے کا افتتاح کر دیا ہے۔ منصوبے کے تحت روڈزانفراسٹرکچر کی بحالی ، سٹریٹ لائٹس کی تنصیب اور بیوٹیفیکیشن سمیت دیگر اقدامات کیے جائیں گے جبکہ ٹریفک رش کم کرنے کے لیے اقدامات، مجسموں کی تنصیب ، گرین ایریاز ڈویلپمنٹ بھی منصوبے کا حصہ ہیں۔وزیر اعلیٰ نے منصوبے کے افتتاح کی تقریب سے خطاب کرتے ہوئے کہا کہ خیبرپختونخوا کے عوام نے تیسری بار عمران خان کے نظریئے کو ووٹ دیا ہم انہیں جتنی سہولت دے سکتے ہیں دیں گے۔
خیبرپختونخوا میں جتنے قوانین اور پالیسیاں بنیں گی انکا محور صرف عوام کی فلاح و بہبود اور عوامی مفاد ہوگا۔ انہوں نے کہا کہ کچھ نادان انگلی اٹھاتے ہیں کہ خیبرپختونخوا کو دہشت گردی کے خلاف جنگ میں این ایف سی کا ایک فیصد مل رہا ہے لیکن دہشتگردی کے خلاف جنگ میں سب سے زیادہ قربانیاں بھی خیبر پختونخوا نے دیں۔ دیگر صوبوں کو مختلف مدات میں خیبر پختونخوا سے بھی زیادہ پیسے مل رہے ہیں۔ وزیر اعلیٰ نے وفاق کے ذمے بقایا جات پر بات کرتے ہوئے کہا کہ پن بجلی کے خالص منافع کی مد میں2200 ارب روپے وفاق کے ذمے بقایا ہیں مگر اس پر کوئی بات نہیں کرتا۔
ضم اضلاع کے لیے 100 ارب روپے سالانہ دینے کا وعدہ کیا گیا تھا مگر پیسے نہیں دیئے گئے۔ ضم اضلاع کے 550 ارب روپے بھی وفاق کے ذمے بقایا ہیں، سابق فاٹا کا انتظامی انضمام تو ہو گیا مگر مالی انضمام نہیں ہوا۔ مجموعی طور پر خیبر پختونخوا کے تین ہزار ارب روپے وفاق کے ذمے واجب الادا ہیں۔ انہوں نے مزید کہا کہ این ایف سی میں خیبر پختونخوا کا حصہ 19.4 فیصد بنتا ہے مگر 14.6 فیصد دیا جاتا ہے۔ ہمیں اپنا پورا حق دیا جائے، وفاق خیبرپختونخوا کے ساتھ سوتیلی ماں جیسا سلوک کر رہا ہے۔
وزیر اعلیٰ نے پشاور کی بیوٹیفیکشن سے متعلق بات کرتے ہوئے کہا کہ پشاور صوبائی دارلخلافہ ہے، اس کی دیکھ بھال اور خوبصورتی ہم سب کی مشترکہ ذمہ داری ہے۔ پشاور کی ترقی اور خوبصورتی کے لئے مزید منصوبے لائیں گے، یہ ہمارا چہرہ ہے۔ عوامی نمائندوں کی مشاورت سے پشاور کے لیے ایک جامع پلان تشکیل دیں گے۔ قبل ازیں ، بریفنگ دیتے ہوئے بتایا گیا کہ بیوٹیفیکیشن منصوبے کے تحت پشاور رنگ روڈ، جمرود روڈ، اور جی ٹی روڈ کی بحالی عمل میں لائی جائے گی۔صوبائی وزیر برائے بلدیات و دیہی ترقی مینا خان آفریدی نے بھی تقریب سے خطاب کیا جبکہ پشاور سے منتخب اراکین اسمبلی، سابق اراکین صوبائی اسمبلی اور محکمہ بلدیات کے حکام بھی تقریب میں موجود تھے۔
