چیف سیکرٹری خیبرپختونخوا کی زیر صدارت چترال سمیت گلیشیر والے اضلاع میں ممکنہ خطرات اور ان سے نمٹنے کے لیے پیشگی اقدامات پر جائزہ اجلاس
پشاور (نمائندہ چترال ٹائمز) چیف سیکرٹری خیبرپختونخوا شہاب علی شاہ کی زیر صدارت گلاف (گلیشیل لیک آؤٹ برسٹ فلڈز) سے ممکنہ خطرات اور ان سے نمٹنے کے لیے پیشگی اقدامات پر اجلاس منعقد ہوا۔ اجلاس میں صوبائی سیکرٹری پی اینڈ ڈی، سیکرٹری ریلیف، ڈی جی پی ڈی ایم اے، چیف اکانومسٹ پی اینڈ ڈی سمیت متعلقہ حکام نے شرکت کی جبکہ گلیشیر والے اضلاع اپر و لوئر چترال، اپر دیر، سوات اور اپر کوہستان کے ڈپٹی کمشنرز ویڈیو لنک کے ذریعے شریک ہوئے۔اجلاس کو بریفنگ میں بتایا گیا کہ اپر چترال کے علاقے ریشن کو ہائی رسک ایریا قرار دیا گیا ہے جبکہ سوات میں اتروڑ، مٹلتان، کالام، لوئر چترال میں مدکلشت اور ارکاری، اپر دیر میں کمراٹ اور اپر کوہستان میں کاندیا وہ علاقے ہیں جہاں گلاف کے خدشات موجود ہیں۔ ان تمام مقامات پر پیشگی حفاظتی اقدامات یقینی بنائے گئے ہیں۔
چیف سیکرٹری نے ہدایت کی کہ گلاف سے متاثرہ اضلاع روزانہ کی بنیاد پر صورتحال کی رپورٹ چیف سیکرٹری آفس کو ارسال کریں اور کسی بھی ہنگامی صورتحال میں رسپانس کے لئے الرٹ رہیں۔ انہوں نے کہا کہ مقامی آبادی کو حالات سے مسلسل آگاہ رکھا جائے اور ارلی وارننگ سسٹم پر خصوصی توجہ دی جائے تاکہ عوام کی جان و مال کا تحفظ یقینی بنایا جا سکے۔چیف سیکرٹری نے مزید ہدایت کی کہ محکمہ منصوبہ بندی، جنگلات، ماحولیاتی تحفظ ایجنسی، پی ڈی ایم اے، آن فارم واٹر مینجمنٹ اور سوئل اینڈ واٹر کنزرویشن سمیت تمام ادارے باہمی رابطے میں رہیں۔ ضلعی انتظامیہ کو حساس مقامات کی نگرانی، بروقت وارننگ اور ہنگامی انخلاء کے لیے پیشگی انتظامات مکمل رکھنے کی ہدایت بھی کی گئی۔
بریفنگ میں بتایا گیا کہ کمراٹ دیر اور اتروڑ سوات میں دریاؤں کے اطراف حفاظتی اقدامات کئے گئے ہیں جبکہ ہائی رسک علاقوں کے نچلے حصوں میں مقامی آبادی کے تحفظ کے لئے خصوصی انتظامات مکمل ہیں۔ ڈی جی پی ڈی ایم اے کے مطابق متعلقہ علاقوں میں واچرز کو تعینات کر دیا گیا ہے جو مقامی آبادی اور مساجد کے ساتھ منسلک رہتے ہوئے حالات پر نظر رکھے ہوئے ہیں۔ مزید برآں، کسی بھی ہنگامی صورتحال کے پیش نظر ضلعی انتظامیہ کی معاونت سے ایمرجنسی سینٹرز بھی قائم کر دئے گئے ہیں۔