چیف سیکرٹری خیبرپختونخوا شہاب علی شاہ کی زیر صدارت سی اینڈ ڈبلیو، معدنیات، توانائی اور پاور محکموں کے گڈ گورننس روڈمیپ اقدامات پر جائزہ اجلاس
پشاور (نمائندہ چترال ٹائمز) چیف سیکرٹری خیبرپختونخوا شہاب علی شاہ کی زیر صدارت سی اینڈ ڈبلیو، معدنیات، توانائی اور پاور محکموں کے گڈ گورننس روڈمیپ اقدامات پر جائزہ اجلاس منعقد ہوا، جس میں متعلقہ سیکرٹریز اور افسران نے شرکت کی۔اجلاس میں سی اینڈ ڈبلیو محکمہ کی اہم اصلاحات پر تفصیل سے غور کیا گیا۔ چیف سیکرٹری نے ہدایت دی کہ تعمیرات میں لائٹ گیج اسٹرکچر اپنائے جائیں تاکہ کم لاگت اور کم وقت میں منصوبے مکمل ہوں۔ ابتدائی طور پر آٹھ سکولوں کی نشاندہی کی گئی ہے جن کا پی سی ون تیار ہے، اس طریقہ سے عمارتیں ایک تہائی کم وقت میں مکمل ہوں گی اور پچاس سال تک پائیدار رہیں گی۔
چیف سیکرٹری نے محکمہ کو ہدایت دی کہ کارکردگی بہتر بنانے کے لئے محکمہ کی سطح پر اہداف پر پیشرفت کا جائزہ لیا جائے۔اجلاس کو بتایا گیا کہ سی اینڈ ڈبلیو محکمہ نے 100 فیصد ای پیڈز پر منتقلی کرلی ہے اور اب بولی جمع کرانے، کال ڈپازٹ اور کام کے تجزیے کا نظام آن لائن ہوگا۔ محکمہ میں فنی مہارت بڑھانے کے لئے ایک اسٹریٹجک پلاننگ ڈیزائن اینڈ سپورٹ یونٹ (ایس پی ڈی ایس یو) قائم کرنے کی تیاریاں مکمل ہیں جو معیار اور منصوبہ بندی میں بہتری لائے گا۔اجلاس میں بڑے منصوبوں پر بھی غور ہوا جن میں پشاور۔ڈی آئی خان موٹروے (365 کلومیٹر)، سوات موٹروے فیز ٹو شامل ہے۔
سڑکوں کے معائنہ و تجزیہ کے لئے رامز سسٹم پر کام جاری ہے جو پہلے ہی پشاور، ڈی آئی خان اور ہری پور میں فعال ہوچکا ہے۔معدنیات کے محکمے سے متعلق بتایا گیا کہ صوبے کے لئے 26 جیالوجیکل نقشے تیار کئے جارہے ہیں. چیف سیکرٹری نے کہا کہ خیبرپختونخوا کی معدنیات کی صلاحیت کی میپنگ جون 2026 تک مکمل ہونا چاہیے تاکہ صنعتی ترقی کے لئے راہ ہموار ہو۔ اس کے علاوہ سائٹ معائنے، مائننگ کیڈسٹرل سسٹم پر ڈیٹا اپ لوڈ، کان کن مزدوروں کے بچوں کے لئے وظائف، آن لائن ادائیگی کا نظام اور کان کن مزدوروں کے لئے رجسٹریشن کارڈز پر بھی کام جاری ہے۔
چیف سیکرٹری نے واضح کیا کہ خیبرپختونخوا منرلز ڈویلپمنٹ اینڈ مینجمنٹ کمپنی کا فعال ہونا منصوبوں پر عمل درآمد اور سرمایہ کاری کے لئے نہایت ضروری ہے۔
توانائی اور پاور محکمے کے حوالے سے اجلاس میں بتایا گیا کہ صوبے میں قابلِ تجدید توانائی کے لئے عالمی سرٹیفکیٹ فریم ورک تیار کیا جارہا ہے تاکہ صاف توانائی کے وسائل سے فائدہ اٹھایا جاسکے۔ اس کے علاوہ مدین ہائیڈرو پاور پراجیکٹ، کالام گبرال (88 میگاواٹ) اور بالاکوٹ (300 میگاواٹ) منصوبوں پر پیش رفت جاری ہے جبکہ ای پروکیورمنٹ سسٹم بھی مکمل طور پر فعال ہوگیا ہے۔چیف سیکرٹری نے کہا کہ مختلف محکموں کی کارکردگی کو روڈمیپ کی بنیاد پر درجہ بندی کی جائے گی۔
……………………………
وفاق جلد از جلد افغانستان کے ساتھ بات چیت کے لیے وفد بھیجنے کا فیصلہ کرے، بیرسٹر ڈاکٹر سیف
پشاور (چترال ٹائمز رپورٹ) وزیر اعلیٰ خیبر پختونخوا کے مشیر اطلاعات و تعلقات عامہ بیرسٹر ڈاکٹر سیف نے وفاق سے کہا ہے کہ وہ جلد از جلد افغانستان کے ساتھ بات چیت کے لیے وفد بھیجنے کا فیصلہ کرے، بصورتِ دیگر خیبر پختونخوا حکومت کا جرگہ افغانستان جانے کے لیے تیار ہے۔ انہوں نے کہا کہ خیبر پختونخوا دہشت گردی کے خلاف فرنٹ لائن صوبہ ہے اور دہشت گردی کا سارا بوجھ خیبر پختونخوا حکومت نے اپنے کندھوں پر اٹھایا ہوا ہے،خیبر پختونخوا کی قربانیوں کی وجہ سے باقی ملک دہشت گردی کی آگ سے محفوظ ہے،وفاقی حکومت ہوش کے ناخن لے اور اس اہم مسئلے کو سنجیدگی سے دیکھے۔
بیرسٹر ڈاکٹر سیف نے کہا کہ ہر چیز پر سیاست نہیں کی جا سکتی، یہ انسانی زندگیوں کا معاملہ ہے، وفاق یا تو خود افغانستان سے رابطہ کرے یا خیبر پختونخوا کو اجازت دے۔انہوں نے کہا کہ اگر دہشت گردی کی آگ خیبر پختونخوا سے باہر پھیلی تو پورا ملک اس کی لپیٹ میں آ جائے گا ایسے وقت میں افغانستان کو نظر انداز کرنا وفاقی حکومت کی بڑی غلطی ہے۔ بیرسٹر ڈاکٹر سیف نے کہا کہ اس سلسلے میں خیبر پختون خوا حکومت نے کئی ماہ پہلے ٹی اور ارز بھی بھیجے لیکن تاحال کوئی جواب نہیں ملا ہے۔ انہوں نے کہا کہ وزیراعلیٰ علی امین خان گنڈاپور امن و امان قائم کرنے کے لئے انتہائی سنجیدہ ہیں اس سلسلے میں قبائلی جرگے بھی منعقد کئے گئے ہیں۔ بیرسٹر ڈاکٹر سیف نے کہا کہ خیبر پختونخوا کو پرامن بنانے کے لئے وزیر اعلیٰ علی امین خان گنڈاپور کی قیادت میں صوبائی حکومت سنجیدہ اقدامات اٹھارہی ہے وفاق کو بھی چاہئے کہ دہشت گردی کے خاتمے کے لئے سنجیدگی کا مظاہرہ کرے۔