چترال کے پرائمری سطح کے طلبہ کے لیے کردار سازی حوالے سے نصاب کی تیاری مکمل، ڈپٹی کمشنر راؤ ہاشم عظیم کے زیرصدارت اجلاس میں بریفنگ
چترال (نمائندہ چترال ٹائمز) ڈپٹی کمشنر لوئر چترال راؤ ہاشم عظیم کے وژن کے مطابق پرائمری سطح کے طلبہ کے لیے کردار سازی ( کریکٹر ایجوکیشن) کے نصاب کی تیاری مکمل کر لی گئی ہے۔
اس حوالے سے ڈپٹی کمشنر راؤ ہاشم عظیم کی زیرِ صدارت ڈپٹی کمشنر آفس لوئر چترال میں ایک جائزہ اجلاس منعقد ہوا، جس میں نصاب کی تیاری سے متعلق اب تک کی پیش رفت کا تفصیلی جائزہ لیا گیا۔
اجلاس کو آگاہ کیا گیا کہ ضلعی انتظامیہ کی سرپرستی میں قائم ٹیکنیکل ورکنگ گروپ، جس میں ڈسٹرکٹ ایجوکیشن افسران، اسامہ وڑائچ اکیڈمی کے منتظمین، علماء کرام، سول سوسائٹی کے رضاکار، جامعہ چترال کے اراکین، تعلیمی اداروں کے نمائندگان اور ضلعی انتظامیہ کے افسران شامل تھے، کی مشترکہ اور مسلسل کاوشوں سے نصاب کی تیاری اور اس کا جامع تکنیکی جائزہ مکمل کیا جا چکا ہے۔
ڈپٹی کمشنر نے نصاب کی تیاری میں شامل تمام اراکین کی محنت، فنی مہارت اور تعاون کو سراہا۔ اجلاس میں بتایا گیا کہ تیار شدہ نصاب آئندہ مرحلے میں ڈائریکٹوریٹ آف کریکولم اینڈ ٹیچر ایجوکیشن خیبر پختونخوا کو جانچ اور توثیق کے لیے پیش کیا جائے گا، جس کی منظوری کے بعد اسے لوئر چترال کے سرکاری و نجی تعلیمی اداروں اور مدارس کے نصاب میں شامل کیا جائے گا۔
اس موقع پر ڈپٹی کمشنر راؤ ہاشم عظیم نے کہا کہ کردار سازی کا یہ نصاب طلبہ میں اخلاقی اقدار، مثبت طرزِ فکر اور ذمہ دار شہری بننے کی صلاحیت کو فروغ دینے کی جانب ایک اہم سنگِ میل ثابت ہوگا۔
