سی ڈی ڈبلیو پی نے چکدرہ–چترال روڈ (N-45 سیکشن IIIK، کلکٹک تا چترال) کے 48 کلومیٹر حصے کی تعمیر کی منظوری دیدی
اسلام آباد (نمائندہ چترال ٹائمز ) سنٹرل ڈیولپمنٹ ورکنگ پارٹی (سی ڈی ڈبلیو پی) نے ’’چکدرہ–چترال روڈ پروجیکٹ (N-45 سیکشن IIIK، کلکٹک تا چترال)‘‘ کے 48 کلومیٹر طویل حصے کی تعمیر و بحالی کے منصوبے کی 10.96 ارب روپے مالیت کی منظوری دے دی ہے۔ یہ منصوبہ پبلک سیکٹر ڈیولپمنٹ پروگرام (PSDP) کے تحت فنانس کیا جائے گا جبکہ مالی معاونت کوریا کے ایگزم بینک کے قرض کے ذریعے فراہم کی جائے گی۔
منصوبے کے تحت این–45 کے کلکٹک سے چترال تک تقریباً 47.98 کلومیٹر طویل حصے کی بہتری، توسیع اور مکمل بحالی کی جائے گی، جسے 7.3 میٹر چوڑی سنگل کیرج وے میں تبدیل کیا جائے گا، جبکہ دونوں اطراف دو میٹر چوڑے شولڈرز تعمیر ہوں گے۔ منصوبے میں مضبوط رِیٹیننگ اسٹرکچرز، ڈھلوانوں کی استحکام کاری، پانچ نئے پلوں کی تعمیر اور 145 کلورٹس کی تعمیر شامل ہے۔
، سیکریٹری اطلاعات مسلم لیگ ن لوئیر چترال نیاز اے نیازی ایڈوکیٹ نے کہا ہے کہ چکدرہ۔چترال روڈ کی بہتری سے شمال مغربی پاکستان کے اہم علاقوں کے درمیان سفری سہولیات میں نمایاں بہتری آئے گی اور آبادی والے مقامات پر موجود Bottleneck حصوں کو ضرورت کے مطابق بائی پاس یا متبادل راستے کے ذریعے بہتر بنایا جائے گا۔ اس منصوبے سے ٹریفک جام اور حادثات میں کمی، گاڑیوں کے آپریٹنگ اخراجات میں بچت اور سفر کے وقت میں نمایاں کمی متوقع ہے، جس سے مقامی آبادی کی معاشی حالت بہتر ہوگی۔ مزید برآں، منصوبہ پڑوسی صوبوں کے ساتھ تجارتی روابط کے فروغ اور خطے میں سیاحت کے اضافے کا بھی باعث بنے گا۔
