اتہک ایریگیشن چینل موڑکھو منصوبہ: منظوری کے قریب ہے ، آئندہ صوبائی کابینہ کے اجلاس میں منظوری کے لیے پیش کی جائےگی ۔ میر ایوب
۔
اپر چترال(نمائندہ چترال ٹائمز ) اتہک ایریگیشن چینل موڑکھو (کوشٹ، موڑکھو،کاغلشٹ) منصوبے کے حوالے سے علاقے کی معروف سیاسی وسماجی شخصیت میر ایوب نے چترال ٹائمز سے گفتگو کرتے ہوئے کہا کہ خیبر پختونخوا کی صوبائی کابینہ نے منصوبے کی منظوری سے قبل مکمل جانکاری کے لیے تین وزراء پر مشتمل ایک اسٹینڈنگ کمیٹی تشکیل دی تھی، جسے منصوبے کا تفصیلی جائزہ لے کر رپورٹ پیش کرنے کی ذمہ داری سونپی گئی تھی۔
انہوں نے بتایا کہ مذکورہ کمیٹی نے پراجیکٹ ڈائریکٹر سے تفصیلی بریفنگ لینے اور مختلف اسٹڈی رپورٹس کا جائزہ لینے کے بعد اپنی مثبت اور قابلِ عمل رپورٹ مرتب کر لی ہے، جو آئندہ صوبائی کابینہ کے اجلاس میں منظوری کے لیے پیش کی جائے گی۔
میر ایوب نے کہا کہ تحریک انصاف کے وزراء پر مشتمل کمیٹی نے مختلف مطالعاتی رپورٹس کی روشنی میں اس منصوبے کو علاقے کی ترقی اور خوشحالی کے لیے نہایت اہم قرار دیا ہے اور اس حوالے سے اپنی مثبت سفارشات صوبائی کابینہ کو ارسال کر دی ہیں۔
انہوں نے مزید کہا کہ ان شاء اللہ صوبائی کابینہ آئندہ اجلاس میں اس منصوبے کی منظوری دے گی، جس کے بعد اسے صوبائی ترقیاتی ورکنگ پارٹی (PDWP) کے سامنے پیش کیا جائے گا۔ بعد ازاں سنٹرل ڈیولپمنٹ ورکنگ پارٹی (CDWP) اور پھر ECNEC سے منظوری کے مراحل طے کیے جائیں گے، جس کے بعد منصوبہ ٹینڈرنگ کے مرحلے میں داخل ہوگا۔
میر ایوب نے منصوبے کی نگرانی میں ایم پی اے اپر چترال اور ڈپٹی اسپیکر خیبر پختونخوا اسمبلی محترمہ ثریا بی بی کے کردار کو سراہتے ہوئے کہا کہ امید ہے وہ اس منصوبے کی تکمیل تک اپنا بھرپور کردار ادا کرتی رہیں گی۔
انہوں نے کہا کہ آئندہ دس دنوں کے اندر پراجیکٹ ڈائریکٹر ایشیائی ترقیاتی بینک (ADB) کے وفد کے ہمراہ منصوبے کے علاقے کا دورہ کریں گے، جس کے بارے میں عوام کو آگاہ کیا جائے گا اور ان کا پرتپاک استقبال کیا جائے گا۔
آخر میں میر ایوب نے تمام مستفیدین، علمائے کرام، خواتین و حضرات اور دیگر افراد سے اپیل کی کہ وہ اس منصوبے کی جلد تکمیل کے لیے دعا کریں، تاکہ علاقے میں زراعت، آبپاشی اور ترقی کے نئے مواقع پیدا ہو سکیں۔ انہوں نے کہا کہ اللہ تعالیٰ اس منصوبے کو عملی جامہ پہنائے اور اس کے ثمرات سے عوام کو مستفید فرمائے۔ آمین۔
