چترال: سرکاری اسکولوں میں معیاری تعلیم کے فروغ کے لیے “اسکولز 2030” ایونٹ کا انعقاد
چترال (نمائندہ چترال ٹائمز)آغا خان فاؤنڈیشن کے پروگرام “اسکولز 2030” کے تحت تعلیم کے معیار کو بہتر بنانے کے لیے ریجنل شوکیسنگ کی تقریب چترال کے ایک مقامی ہوٹل میں منعقد ہوئی۔ تقریب میں محکمہ تعلیم کے افسران، تعلیمی اداروں کے سربراہان اور اساتذہ نے شرکت کی۔
آغا خان فاؤنڈیشن کے نمائندوں سید ولی شاہ اور بی بی آمینہ نگار نے بتایا کہ “اسکولز 2030” ایک دس سالہ عالمی تعلیمی منصوبہ ہے جو پاکستان سمیت دس ممالک میں جاری ہے۔ اس کا مقصد دور دراز علاقوں کے سرکاری اسکولوں میں معیاری تعلیم کو فروغ دینا اور اساتذہ کو جدید تدریسی طریقوں سے آراستہ کرنا ہے۔
ایونٹ میں چترال کے 15 اساتذہ نے اپنی تعلیمی جدتوں (innovations) کو پیش کیا، جن میں سے پانچ کو اسلام آباد میں ہونے والے قومی شوکیسنگ ایونٹ کے لیے منتخب کیا گیا۔ کامیاب اساتذہ کو عالمی فورم میں شرکت کا موقع بھی ملے گا۔
تقریب کے مہمانانِ خصوصی ڈی ای او مفتاح الدین اور ڈی ڈی او شکیلہ انجم نے اسکولز 2030 کے کردار کو سراہتے ہوئے کہا کہ یہ پروگرام چترال کے سرکاری اسکولوں میں سیکھنے اور سکھانے کے عمل میں مثبت تبدیلی لا رہا ہے۔
تقریب میں اپر اور لوئر چترال کے تعلیمی افسران، اے کے آر ایس پی، اے کے یو آئی ای ڈی، آئی ٹی آر ای بی اور دیگر تعلیمی اداروں کے نمائندے شریک ہوئے۔ شرکاء نے اساتذہ کی کاوشوں کو سراہا اور امید ظاہر کی کہ آغا خان فاؤنڈیشن معیاری تعلیم کے فروغ کے لیے اپنی کوششیں جاری رکھے گا۔
