کنزیومر پروٹیکشن کونسل چترال کے اسسٹنٹ ڈائرکٹر کے خلاف اختیارات سے تجاوز پر کاروائی کے لئے حکومت کو دی گئی ڈیڈلائن ختم، کل جمعہ کے بعد بھرپور احتجاج کا اعلان

چترال (نمائندہ چترال ٹائمز ) لویر چترال میں کنزیومر پروٹیکشن کونسل محکمہ انڈسٹریز کے اسسٹنٹ ڈائرکٹر عرفان عزیز کے خلاف اختیارات سے تجاوز پر کاروائی کے لئے حکومت کو دی گئی ڈیڈلائن جمعہ کے دن ختم ہونے پر سول سوسائٹی تنظیموں اور سیاسی جماعتوں کا نماز جمعہ کے بعد میدان سجانے اور طاقت کا مظاہر ہ کرنے کا اعلان کے بعد شہر کے پرامن حالات کا کشیدہ ہونے کے خطرات منڈلانے لگے۔سیاسی جماعتوں کی طرف سے جماعت اسلامی لویر چترال کے جنرل سیکرٹری وجیہہ الدین اور تجاریونین کے صدر دین محمد ندیم نے اپنے اپنے بیانات میں کہا ہے کہ تین دن پہلے ضلعی انتظامیہ اور پولیس کے افسران نے اتالیق پل پر احتجاجی جلسہ سے شرکاء کے سامنے اپنے کئے ہوئے وعدوں پر پورا کرتے ہوئے نظر نہیں آرہے ہیں کیونکہ جمعرات کے مقرر کردہ دن تک نہ تو اختیارات سے تجاوز کرنے اور ایک شہری کو ہراسان کرنے اور زدوکوب کرنے کے مرتکب افسر کے خلاف نہ تو پولیس نے ایف آئی آر درج کیا اور نہ ہی ایڈیشنل ڈی سی کی طرف سے انکوائری میں کوئی پیش رفت ہوئی اور نہ ہی دکانداروں سے لئے گئے جرمانوں کی رسیدوں کا اڈٹ شروع ہوا۔ انہوں نے اس بات پر افسوس کا اظہار کیاکہ ضلعی انتظامیہ اور پولیس ایک ایسے افسر کو بچانے کی کوشش کررہے ہیں جوکہ گزشتہ چار سالوں سے تاجر برادری کا جینا حرام کررکھا تھا اور اب وہ طاقت کے نشے میں مست ہوکر سرعام شہریوں کی بے عزتی کرنے پر اتر آیا ہے جس کے لئے انہوں نے چترال لیویز کے جوانوں کو پولیس کایونیفارم پہنا کر جعل سازی سے بھی دریغ نہیں کیا۔ انہوں نے کہاکہ اب کی بار مطالبات کی منظوری تک ہڑتال جاری رہے گا اور انتظامیہ اب طفل تسلی کے ذریعے انہیں دھوکہ دینے کی کوشش نہ کرے۔انہوں نے کہاکہ نماز جمعہ کے فوری بعد اتالیق پل میں احتجاج کا آعاز کردیا جائے گا۔ تجاریونین کے صدر دین محمدندیم کا کہنا تھاکہ ضرورت پڑنے پر ایگزیکٹو کمیٹی کی مشاورت سے غیر معینہ مدت تک شٹر ڈاون ہڑتال کے لئے بھی کا ل دیا جائے گا۔