پاکستان موسمیاتی خطرات کا سب سے زیادہ شکار دنیا میں پانچواں ملک ہے، پوری قوم شجر کاری مہم میں حصہ لے، وزیراعظم محمد شہباز شریف کا تقریب سے خطاب

اسلام آباد( چترال ٹائمزرپورٹ)وزیراعظم محمد شہبازشریف نے ملک کو ماحولیاتی خطرات سے بچانے کے لئے پوری قوم کو شجر کاری مہم میں بھرپور حصہ لینے کی اپیل کرتیہوئے کہا ہے کہ پاکستان دنیا میں موسمیاتی خطرات کا سب سے زیادہ شکار پانچواں ملک ہے، موسمیاتی تبدیلی کے خطرات سے نمٹنے کے لئے آگاہی ضروری ہے، ملک میں جنگلات کارقبہ صرف 5 فیصد ہے، رواں سال پودے لگانے کا ہدف دوگناکیاجائے گا۔ان خیالات کا اظہار انہوں نے وزیراعظم ہاؤس میں موسم بہار کی ملک گیر شجر کار ی مہم کے آغاز کی تقریب سے خطاب کرتے ہوئے کیا۔اس موقع پر وزیرمملکت برائے انفارمیشن ٹیکنالوجی شزہ فاطمہ خواجہ بھی موجود تھیں۔وزیراعظم محمد شہبازشریف نے کہا کہ انہوں نے پودالگاکر پوریملک میں موسم بہار کی شجر کاری کا آغازکر دیاہے، ہماری پچھلی حکومت نے ملک بھر میں درخت لگانے کا جوہدف مقرر کیا تھا، رواں سال لگائے جانے والے پودوں کی تعداد دوگنا کریں گے۔ان کا کہنا تھا کہ ملک کے مجموعی رقبے کے لحاظ سے جنگلات کاتناسب صرف 5 فیصد ہے، عالمی ماحولیاتی رسک انڈیکس رپورٹ کے مطابق پاکستان موسمیاتی خطرات کا سب سے زیادہ شکار دنیا میں پانچواں ملک ہے۔

انہوں نے کہا کہ 1999 سے 2018 کے دوران موسمیاتی تبدیلیوں کی وجہ سے 10ہزار قیمتی جانیں ضائع ہوئیں اور ہماری معیشت کو اربوں ڈالرکانقصان ہوا، اس لئے تعلیمی اداروں میں بھی اس خطرے سے آگاہی فراہم کرناضروری ہے اور شجر کاری مہم کو پورے ملک میں پھیلانے کے لئے تمام تر کوششیں کی جانی چاہئیں۔وزیراعظم نے کہا کہ پوری قوم کو چاہیے کہ ملک کو ماحولیاتی خطرات سے بچانے اور صحت مند ماحول مہیا کرنے کے لئے شجر کاری کی مہم میں بڑھ چڑھ کر حصہ لے تاکہ پاکستان ہر قسم کی ماحولیاتی آلودگی اور ماحولیاتی خطرات سے محفوظ رہے۔قبل ازیں وزیراعظم نے پی ایم ہاؤس میں پودالگا کر موسم بہار کی ملک گیر شجر کاری مہم کا آغاز کیا۔واضح رہے کہ رواں سال 2024 میں موسم بہار کی شجر کاری مہم کے دوران ملک بھر میں مجموعی طورپر 5 کروڑ 43لاکھ 80ہزار پودے لگائے جائیں گے، 2023 کی موسم برسات کی شجر کاری مہم کے دوران 4 کروڑ 90 لاکھ سے زائد پودے لگائے گئے تھے۔موسم بہار کی شجر کاری مہم کے سلسلے میں پنجاب میں ایک کروڑ 41لاکھ، سندھ میں ایک کروڑ 17لاکھ 20ہزار، خیبر پختونخوا میں 57لاکھ 10ہزار، بلوچستان میں 30 لاکھ، آزاد جموں کشمیر میں ایک کروڑ 18 لاکھ 50 ہزار اور گلگت بلتستان میں 80 لاکھ پودے لگانے کا ہدف مقرر کیاگیا ہے۔ موسم برسات 2023 کی شجر کاری مہم کے دوران پنجاب میں ایک کروڑ 46لاکھ 20ہزار،سندھ میں ایک کروڑ 90 لاکھ، خیبرپختونخوا میں ایک کروڑ 6 لاکھ 80 ہزار، بلوچستان میں 10لاکھ 60 ہزار، آزاد جموں و کشمیر میں 33 لاکھ اور گلگت بلتستان میں 3 لاکھ 60 ہزار پودے لگائے گئے۔

قومی اسمبلی میں 7آرڈیننس پیش کر دیئے گئے

اسلام آباد(سی ایم لنکس)قومی اسمبلی میں 7 آرڈیننس پیش کر دیئے گئے۔جمعہ کو قومی اسمبلی میں وفاقی وزیر قانون سینیٹر اعظم نذیر تارڑ نے یک بعد دیگرے پاکستان براڈ کاسٹنگ کارپوریشن (ترمیمی) آرڈیننس، 2023، پاکستان نیشنل شپنگ کارپوریشن (ترمیمی) آرڈیننس، 2023، پاکستان پوسٹل سروسز مینجمنٹ بورڈ (ترمیمی) آرڈیننس، 2023، نیشنل ہائی وے اتھارٹی (ترمیمی) آرڈیننس، 2023، فوجداری قانون (ترمیمی) آرڈیننس، 2023، نجکاری کمیشن (ترمیمی) آرڈینس 2023ء اور ٹیلی مواصلات ایپلیٹ ٹربیونل کا قیام آرڈیننس 2023ء پیش کئے۔

قومی اسمبلی میں غزہ میں اسرائیلی جارحیت کے دوران شہید ہونے والے فلسطینیوں کے لئے فاتحہ خوانی

اسلام آباد( چترال ٹائمزرپورٹ)قومی اسمبلی میں غزہ میں اسرائیلی جارحیت کے دوران شہید ہونے والے معصوم اور بے گناہ فلسطینیوں کے لئے فاتحہ خوانی کرائی گئی۔جمعہ کو قومی اسمبلی میں رکن قومی اسمبلی شازیہ مری نے کہا ہے کہ غزہ میں جمعہ کومزید 21 فلسطینی شہید اور 150 زخمی ہوئے ہیں۔ ملک عامر ڈوگر نے کہا کہ ہم اس قتل و غارت کی مذمت کرتے ہیں۔رمضان المبارک کے دوران یہ ظلم اور مسلمان ممالک کی خاموشی افسوسناک ہے۔ سپیکر کے کہنے پر جام کمال نے ایوان میں فاتحہ خوانی کرائی۔