الیکشن کمیشن آف پاکستان کی طرف سے پاکستان تحریک انصاف کے چیرمین عمران خان کی نااہلی کے خلاف پی ٹی آئی کے کارکنان کا چترال شہر اور مختلف مقامات پر احتجاجی مظاہرہ
چترال (نمائندہ چترال ٹایمز) الیکشن کمیشن آف پاکستان کی طرف سے پاکستان تحریک انصاف کے چیرمین عمران خان کی نااہلی کے خلاف پی ٹی آئی کے کارکنان نے چترال شہر اور مختلف مقامات پر احتجاجی جلسہ منعقد کیا اور کئی گھنٹوں تک بائی پاس روڈ کو بندکئے رکھا جس سے لویر چترال کے ضلعی صدر اور تحصیل چیرمین چترال شہزادہ امان الرحمن، جنرل سیکرٹری لویر چترال اور ویلج چیرمین فخر اعظم اور دوسروں نے خطاب کیا اور اس فیصلے کو مذمت کرتے ہوئے کہاکہ عمران خان کو سزا ان کی ایمانداری اور چوروں کے خلاف اعلان جہاد پر دیا جارہا ہے۔ انہوں نے کہاکہ ملک کے 22کروڑ عوام نے عمران خان کو اپنا نجات دہندہ قرار دیا ہے جس کا ثبوت حالیہ ضمنی الیکشن ہیں اور خان صاحب کی غیر معمولی اور تاریخی مقبولیت کو دیکھ کر امپورٹڈ حکومت اور ان کے سرپرست بوکھلا گئے ہیں اور ایسے ہتھکنڈوں پر اتر آئے ہیں اور یہ شرمناک فیصلہ عوام کو ہرگز منظور نہیں اور نہ ہی اس سے اسلام آباد کی طرف لانگ مارچ کو روکا جاسکتا ہے۔ انہوں نے کہاکہ اس فیصلے سے پی ٹی آئی کے کارکنان میں اور بھی جوش وجذبہ پید اہوگیا ہے اوروہ ذیادہ مضبوط عزم کے ساتھ چوروں اور لٹیروں کے خلاف میدان میں اتررہے ہیں اور عوامی سمندر کا راستہ روکنا کسی کے بس کی اب بات نہیں رہی۔
