وزارت مذہبی امور نے عازمین حج کی سہولت کے لیے ہیلپ لائن قائم کر دی

اسلام آباد( چترال ٹایمزرپورٹ)وزارت مذہبی امور و بین المذاہب ہم آہنگی نے حج2022 کے عازمین کی فوری رجسٹریشن، رہنمائی اور شکایات کے ازالے کے لیے ایک خصوصی حج ہیلپ لائن قائم کر دی ہے۔وزارت مذہبی امور کے ذرائع کے مطابق عازمین حج ان فون نمبروں 051-9216980، 051-9216981; 051-9216982; 051-9205696 پر رابطہ کرکے اپنے حج سے متعلق سوالات کے فوری جواب حاصل کرسکتے ہیں۔ پاکستان کو اس سال 81,132 عازمین کا حج کوٹہ ملا ہے جس میں 40 فیصد سرکاری سکیم اور60 فیصد پرائیویٹ سکیم کے تحت حج کر سکیں گے۔حجاج کرام کے لیے عمر کی بالائی حد 65 سال مقرر کی گئی ہے۔ درخواستوں کی وصولی یکم مئی سے شروع کی گئی ہے جو13مئی تک آن لائن اور بینکوں کے ذریعے جمع کرائی جا سکتی ہیں، ٹوکن منی9 مئی سے 13 مئی تک جمع کرائی جا سکے گی۔ گروپ بیسڈ حج قرعہ اندازی 15 مئی کو ہو گی، درخواست دہندگان کو 50,000 روپے بطور ٹوکن رقم جمع کرانا ہو گی، درخواستیں وزارت کی طرف سے مقرر کردہ شیڈول بینکوں میں وصول کی جا رہی ہیں۔حج پالیسی کے مطابق عازمین کو بوسٹر ڈوز کی ویکسی نیشن مکمل کرانا لازمی ہے اور روانگی سے کم از کم 72 گھنٹے قبل پی سی آر ٹیسٹ کرانا ہوگا تاکہ یہ یقینی بنایا جا سکے کہ عازم حج کورونا وائرس پازیٹو نہیں۔

حکومت کا نسرین جلیل کو گورنرسندھ بنانے کا فیصلہ

اسلام آباد(سی ایم لنکس) حکومت نے ایم کیوایم پاکستان کی نسرین جلیل کو گورنر سندھ بنانے کا فیصلہ کیا ہے۔ ایم کیو ایم پاکستان کی جانب سے وزیراعظم شہبازشریف کو گورنر سندھ کے لئے وسیم اختر، نسرین جلیل اور عامر خان کے نام دیئے تھے، اور حکومت نے اب ایم کیو ایم کی نسرین جلیل کو گورنر سندھ بنانے کا فیصلہ کرلیا ہے۔ذرائع کا کہنا ہے کہ وزیراعظم کی جانب سے نسرین جلیل کو گورنر سندھ مقرر کرنے کے لیے سمری صدر مملکت عارف علوی کو ارسال کردی گئی ہے۔