خیبر پختونخوا حکومت کا لوکل کونسل ایکٹ 2013 بلدیاتی نظام کے لئے ایک گیم چینجر ثابت ہوا۔ کامران بنگش۔
پشاور (چترال ٹائمز رپورٹ) وزیراعلیٰ خیبرپختونخوا کے معاون خصوصی برائے اطلاعات و اعلی تعلیم کامران بنگش نے کہا کہ حکومت خیبرپختونخوا اسی سال نومبر میں مرحلہ وار بلدیاتی انتخابات کروا کر اپنے ایک اور وعدے کو عملی جامہ پہنائے گی۔ ان خیالات کا اظہار انہوں نے اسلام آباد کے ایک مقامی ہوٹل میں یورپی یونین اور لوکل کونسل ایسوسی ایشن پنجاب کے تعاون سے بلدیاتی نظام اور انتخابات کے حوالے سے ایک قومی کانفرنس کے انعقاد کے موقع پر کیا۔ جس میں چاروں صوبوں کے لوکل کونسل ایسوسی ایشن کے ممبرز اور حکومتی و اپوزیشن جماعتوں کے ممبران اور و وفاقی و صوبائی وزرا ء نے شرکت کی۔
اس موقع پر پر وزیر اعلی کے معاون خصوصی برائے اطلاعات وتعلقات عامہ کامران بنگش نے کہا کہ بلدیاتی انتخابات کا انعقاد پی ٹی آئی حکومت کے ایجنڈے کا حصہ ہے اور وزیراعظم عمران خان کے نظریے اور سوچ کے مطابق خیبر پختونخوا حکومت نے بلدیاتی انتخابات اسی سال نومبر میں کرانے کا فیصلہ کیا ہے اور اس طرح سے انشاء اللہ خیبرپختونخوا حکومت پاکستان میں بلدیاتی انتخابات کے انعقاد میں سبقت حاصل کر لے گی۔ اس موقع پر ان کا یہ بھی کہنا تھا کہ خیبر پختونخوا حکومت کا لوکل کونسل ایکٹ 2013 بلدیاتی نظام کے لئے ایک گیم چینجر تھا جو کہ مشرف حکومت کی بلدیاتی نظام سے بھی بہتر تھا اور اب وقت کے تقاضے کے لحاظ سے اس میں مزید تبدیلیاں کی گئی ہیں۔
صوبائی حکومت نے بلدیاتی نظام کو مکمل طور پر با اختیار بنانے کے لیے قواعد وضع کر لیے ہیں۔ اس حوالے سے خیبر پختونخوا حکومت نے الیکشن کمیشن آف پاکستان کی مشاورت سے بلدیاتی انتخابات کے انعقاد کے لیے تمام تر ضروریات کو حتمی شکل دے دی ہیں اور ابھی بھی خیبر پختونخوا حکومت بلدیاتی انتخابات کے انعقاد کے لئے الیکشن کمیشن آف پاکستان کے ساتھ قریبی رابطے میں ہے۔ ان کا کہنا تھا کہ ہماری حکومت اقتدار کی منتقلی کیلئے پرعزم ہیں اور اس نئے بلدیاتی نظام کا واحد مقصد عوام کی خدمت ان کی دہلیز پر کرنا ہے۔ ان کا مزید کہنا تھا کہ خیبر پختونخوا حکومت نے بلدیاتی انتخابات مرحلہ وار کرانے کا فیصلہ کیا ہے۔ پہلے مرحلے میں بلدیاتی انتخابات ویلج اور نیبرہوڈ کونسلوں میں ہونگے تحصیل اور ضلعی سطح پر انتخابات اگلے مرحلے میں ہونگے۔