چترال میں پاکستان پوسٹ کی تین اہم شاخیں مستقل بند، دور دراز علاقوں کے عوام مشکلات کا شکار

۔

چترال (نمائندہ چترال ٹائمز ) پاکستان پوسٹ نے چترال کے ساتھ اپنی چھ دہائیوں پر محیط رشتہ ناطہ کی بنیادوں کو کمزور کرتے ہوئے بے رخی برتنے کا سلسلہ شروع کیا ہے۔ حال ہی میں چترال کے دور دراز دیہات میں اپنی تین اہم شاخیں مستقل طور پر بند کر دی ہیں، جس سے ہزاروں رہائشی خطوط اور پارسل کی ضروری خدمات تک رسائی سے محروم ہو کر شدید مشکلات کا شکار ہو گئے ہیں۔

بند کی جانے والی یہ سہولیات جو لوئر چترال کے علاقوں اشریت اور ایون، اور اپر چترال کے علاقے بریپ میں واقع ہیں ،پاکستان کے چند انتہائی الگ تھلگ سرحدی علاقوں بشمول دشوار گزار وادی بروغل کے لیے مواصلات کا واحد ذریعہ تھیں۔

میڈیا کو اس خبر کی تصدیق کرتے ہوئے، چترال جنرل پوسٹ آفس کے سینئر پوسٹ ماسٹر مجیب الرحمن نے بتایا کہ یہ مستقل بندشیں مکمل طور پر گزشتہ کئی سالوں سے ہونے والے مسلسل مالیاتی نقصانات کے باعث کی گئی ہیں۔ انہوں نے وضاحت کی کہ ان مخصوص شاخوں سے حاصل ہونے والی آمدنی ان کے اخراجات کے مقابلے میں بہت کم تھی۔

سینئر پوسٹ ماسٹر نے اشارہ کیا کہ ان تینوں بند ہونے والے مراکز کے زیر اثر آنے والے جغرافیائی علاقوں کو اب قریبی فعال ڈاک خانوں میں ضم کر دیا جائے گا تاکہ سروس کے تسلسل کو یقینی بنایا جا سکے۔

تاہم، مقامی رہائشیوں اور کمیونٹی رہنماؤں نے اس فیصلے کو یکسر مسترد کر دیا ہے اور عوامی خدمت کے بجائے تجارتی منافع کو ترجیح دینے کے حکومتی اقدام پر گہرے دکھ اور رنج کا اظہار کیا ہے۔

ان کا استدلال تھا کہ انتہائی پسماندہ خطوں میں بنیادی مواصلاتی ڈھانچہ فراہم کرنا ریاست کی بنیادی ذمہ داری ہے، قطع نظر اس کے کہ وہ مالی طور پر فائدہ مند ہے یا نہیں۔

اپر چترال میں بریپ برانچ کی بندش نے شدید جغرافیائی حالات کی وجہ سے خاص تشویش پیدا کر دی ہے۔ یارخون سے چترال ضلع کونسل کے سابق رکن محمد وزیر خان نے اس فیصلے کو اپر یارخون، لوئر یارخون اور وادی بروغل کے لوگوں کے لیے ”تباہ کن” قرار دیا۔

خان نے کہا، ”بریپ کی بندش کے بعد اب قریب ترین فعال پوسٹ آفس مستوج میں واقع ہے۔ مستوج بروغل کے علاقے سے تقریباً 150 کلومیٹر دور ہے۔ ان طویل جغرافیائی فاصلوں اور کچے راستوں کے پیش نظر، باقاعدہ ڈاک خدمات کو جاری رکھنا تقریباً ناممکن ہے۔”

یارخون کے عوام نے بند شدہ بریپ پوسٹ آفس کے سامنے احتجاج کیا جس سے مقامی رہنماؤں خطاب کرتے ہوئے کہاکہ مختلف سرکاری محکموں میں ملازمتوں کے لیے درخواست دینے والے تعلیم یافتہ نوجوان اس سے سب سے زیادہ متاثر ہوں گے کیونکہ ٹیسٹ اور انٹرویو کے دعوت نامے صرف پاکستان پوسٹ کے ذریعے بھیجے جاتے ہیں اور روزگار کا موقع گنوانا ان کے لیے ‘کسی بڑی تباہی’ سے کم نہیں ہے۔

مقامی رہنماؤں نے خبردار کیا کہ ان بندشوں سے سماجی و اقتصادی چیلنجز کا ایک سلسلہ شروع ہو جائے گا کیونکہ ان دور دراز وادیوں کے سینکڑوں طلباء جو علامہ اقبال اوپن یونیورسٹی جیسے فاصلاتی تعلیمی اداروں میں زیر تعلیم ہیں، نصابی کتب حاصل کرنے، اسائنمنٹس جمع کرانے اور امتحانی شیڈول حاصل کرنے کے لیے مکمل طور پر پاکستان پوسٹ پر انحصار کرتے ہیں۔

بند شدہ ایون پوسٹ آفس علاقے میں سیاحت کی ترقی میں اہمیت کا حامل ہے جوکہ تینوں کالاش وادیوں بمبوریت، بریر اور رمبور میں پوسٹل سروس مہیا کرتی ہے جہاں ہر سال ہزاروں یورپین ٹورسٹ آتے ہیں اور پاکستان پوسٹ کی اس برانچ کے ذریعے رابطہ بحال رکھتے ہیں۔ متاثرین کا کہنا ہے کہ کالاش وادیوں سے واپسی پر کئی سیاح پاکستان پوسٹ کو استعمال لاتے ہوئے اس علاقے کے ساتھ اپنی روابط برقرار رکھتے ہیں۔

چترال کے عوامی حلقوں نے وزیر اعظم پاکستان اور وزیر مواصلات سے مطالبہ کیا ہے کہ اس فیصلے کو فوری طور پر واپس لیتے ہوئے بند شدہ برانچوں کو بحال کئے جائیں۔