چترال میں جماعت اسلامی اور جمعیت علمائے اسلام کے زیر اہتمام مہنگائی و کرپشن کے خلاف احتجاجی جلسے
۔
چترال (نمائندہ چترال ٹائمز) ملک میں بڑھتی ہوئی مہنگائی، کرپشن اور عوامی مسائل کے خلاف جماعت اسلامی اور جمعیت علمائے اسلام کی جانب سے لوئر اور اپر چترال میں احتجاجی جلسوں کا انعقاد کیا گیا، جہاں مقررین نے حکومت کی پالیسیوں کو شدید تنقید کا نشانہ بناتے ہوئے احتجاجی تحریک جاری رکھنے کا اعلان کیا۔
لوئر چترال کے علاقے دروش چوک میں جماعت اسلامی چترال لوئر کے زیر اہتمام جلسہ منعقد ہوا جس کی صدارت ضلعی امیر وجیہ الدین نے کی۔ جلسے سے قیم ضلع عبدالحق، سلطان محمد، شجاع الحق بیگ اور امیر شریف نے بھی خطاب کیا۔ مقررین نے کمر توڑ مہنگائی پر حکومت کو آڑے ہاتھوں لیتے ہوئے کہا کہ عوام شدید معاشی مشکلات کا شکار ہیں۔
اس موقع پر وجیہ الدین نے اعلان کیا کہ عید کے بعد جماعت اسلامی چترال لوئر میں کرپشن کے خلاف تحریک کے دوسرے مرحلے کا آغاز کرے گی، جس کے تحت یونین کونسل سطح پر احتجاجی مظاہروں کے علاوہ چترال بازار میں دھرنوں کا بھی اہتمام کیا جائے گا۔ انہوں نے کہا کہ حافظ نعیم الرحمن کی قیادت میں ملک گیر تحریک کو کامیاب بنایا جائے گا۔
دریں اثنا اپر چترال کے علاقے وریجون بازار میں جمعیت علمائے اسلام کے زیر اہتمام جمعہ نماز کے بعد احتجاجی جلسہ منعقد ہوا جس کی صدارت امیر جمعیت علمائے اسلام اپر چترال مولانا محمد یوسف نے کی۔ جلسے میں پارٹی کارکنوں، علمائے کرام اور عوام کی بڑی تعداد نے شرکت کی۔
جلسے سے مولانا فداالرحمن، شمس الرحمن لال اور سماجی شخصیت محمد علی شاہ سمیت دیگر مقررین نے خطاب کرتے ہوئے حالیہ مہنگائی کو عوام پر ظلم اور ناانصافی قرار دیا اور اس کے خلاف بھرپور تحریک چلانے کے عزم کا اظہار کیا۔ احتجاجی جلسہ مولانا محمد یوسف کے صدارتی خطاب اور دعائیہ کلمات کے ساتھ اختتام پذیر ہوا۔
