الخدمت فاؤنڈیشن اور جماعت اسلامی کے زیر اہتمام “بنو قابل” پروگرام کے تحت چترال میں مفت آئی ٹی اور ٹیکنیکل کورسز میں داخلوں کیلئے ٹیسٹ کا انعقاد، ہزاروں طلبہ و طالبات کی شرکت
۔
۔چترال (نمائندہ چترال ٹائمز) الخدمت فاؤنڈیشن اور جماعت اسلامی کے زیر اہتمام “بنو قابل” پروگرام کے تحت چترال میں مفت آئی ٹی اور ٹیکنیکل کورسز میں داخلوں کیلئے ٹیسٹ کا انعقاد کیا گیا، جس میں ہزاروں طلبہ و طالبات نے بھرپور شرکت کی۔
چترال کے تاریخی پولو گراؤنڈ میں منعقدہ اس پروگرام کیلئے دس ہزار سے زائد نشستوں کا انتظام کیا گیا تھا، جہاں مختلف عمر کے نوجوانوں نے جدید آئی ٹی تعلیم اور ہنر سیکھنے میں گہری دلچسپی کا اظہار کرتے ہوئے ٹیسٹ دیا۔ منتظمین کے مطابق کامیاب امیدواروں کو مختلف دورانیے کے آئی ٹی، فری لانسنگ، ڈیجیٹل اسکلز اور ٹیکنیکل کورسز میں مفت تربیت فراہم کی جائے گی۔
اس موقع پر امیر جماعت اسلامی پاکستان حافظ نعیم الرحمن اور الخدمت فاؤنڈیشن و بنو قابل پروگرام کے ذمہ داران نے کہا کہ اس منصوبے کا مقصد نوجوان نسل کو جدید تقاضوں سے ہم آہنگ کرنا، انہیں باعزت روزگار کے مواقع فراہم کرنا اور آئی ٹی کے شعبے میں مہارت دلانا ہے تاکہ نوجوان ملکی اور بین الاقوامی سطح پر آن لائن روزگار حاصل کر سکیں۔
منتظمین کے مطابق بنو قابل پروگرام کے تحت نوجوانوں کو جدید کمپیوٹر ٹیکنالوجی، فری لانسنگ، گرافک ڈیزائننگ، ڈیجیٹل مارکیٹنگ اور دیگر اہم شعبوں میں تربیت دی جائے گی جبکہ مستقبل میں اس پروگرام کے دائرہ کار کو مزید وسیع کرنے کا بھی منصوبہ ہے۔
پروگرام میں شریک طلبہ و طالبات نے اس اقدام کو خوش آئند قرار دیتے ہوئے کہا کہ چترال جیسے دور افتادہ علاقے میں نوجوانوں کیلئے مفت آئی ٹی تعلیم اور تربیت کے مواقع انتہائی اہمیت رکھتے ہیں، جس سے انہیں اپنے مستقبل کو بہتر بنانے میں مدد ملے گی۔
