چترال گرم چشمہ روڈ کی دس کلومیٹر پر ترکول بچھانےکا کام شروع کردیا گیا، پی ایم ایل این کی سینئر قیادت اور ڈپٹی کمشنر کی موجودگی میں کام کا افتتاح
۔
چترال (نمائندہ چترال ٹائمز) گرم چشمہ روڈ کی اسفالٹنگ کے منصوبے کا باقاعدہ آغاز ایک پروقار افتتاحی تقریب کے ساتھ کر دیا گیا۔ افتتاح وزیرِاعظم کے کوآرڈینیٹر عبدالولی خان ایڈوکیٹ اور ڈپٹی کمشنرراو ہاشم عظیم نے کیا،اس موقع پر پاکستان مسلم لیگ (ن) چترال کے سینئر رہنما وسابق ایم این اے شہزادہ افتخار الدین، ضلعی انتظامیہ کے دیگر افسران کے علاوہ نیشنل ہائی وے اتھارٹی (این ایچ اے) کے اعلیٰ حکام بھی موجود تھے۔ جبکہ وزیرِاعظم انسپیکشن کمیشن کی خدمات کو سراہتے ہوئے انہیں خراجِ تحسین بھی پیش کیا گیا، جن کی مسلسل کاوشوں سے یہ اہم منصوبہ عملی شکل اختیار کر سکا۔
شاہ شغور کے مقام پر منعقدہ تقریب کے ساتھ ہی ورک اوپننگ کے تحت منصوبے پر عملی کام شروع کر دیا گیا۔ تقریب سے قبل ڈپٹی کمشنر آفس چترال میں ایک اجلاس منعقد ہوا، جس میں منصوبے کی پیش رفت اور آئندہ حکمتِ عملی پر تفصیلی تبادلہ خیال کیا گیا۔
بعد ازاں وفد نے چیو پل سے شاشا تک سڑک کا معائنہ کیا اور شاشا میں قائم اسفالٹ پلانٹ کا دورہ کیا، جہاں ابتدائی مرحلے میں 10 کلومیٹر حصے پر کام شروع کیا جا رہا ہے۔ اس موقع پر مقامی عوام، تاجر برادری، ڈرائیور یونین، وکلا، نوجوانوں اور پاکستان مسلم لیگ (ن) کی ضلعی قیادت نے بڑی تعداد میں شرکت کی اور منصوبے کے آغاز کو خوش آئند قرار دیا۔
معائنے کے دوران چیوپل میں انتظار گاہ کی تعمیر اور یونیورسٹی روڈ کے وہ مختلف مقامات کا جائزہ لیا گیا جو طویل عرصے سے نہایت خستہ حالی کا شکار ہیں۔ اس موقع پر طلبہ قیادت نے ڈپٹی کمشنر اور ان کی ٹیم کو ان جگہوں کے بارے میں بریفنگ دی جہاں مرمت اور نالوں کی صفائی کا کام درکار ہے۔ جامعہ چترال کے طلبا تنظیموں کے نمائندوں نے سڑک کی خستہ حالی کی نشاندہی کے ساتھ ڈپٹی کمشنر اور متعلقہ حکام اور نمائندوں کا شکریہ ادا کیا کہ جن کی کاوشوں سے یونیورسٹی روڈ کی مرمت کا آغاز کردیا گیا ۔
مقررین نے اپنے خطاب میں کہا کہ گرم چشمہ روڈ کی تعمیر علاقے کی دیرینہ ضرورت تھی، جس کی تکمیل سے نہ صرف سفری سہولیات میں بہتری آئے گی بلکہ مقامی معیشت کو بھی فروغ ملے گا اور سیاحت کے شعبے میں بھی مثبت اثرات مرتب ہوں گے۔
معائنے کے دوران چیوپل میں انتظار گاہ کی تعمیر اور یونیورسٹی روڈ کے وہ مختلف مقامات کا جائزہ لیا گیا جو طویل عرصے سے نہایت خستہ حالی کا شکار ہیں۔ اس موقع پر طلبہ قیادت نے ڈپٹی کمشنر اور ان کی ٹیم کو ان جگہوں کے بارے میں بریفنگ دی جہاں مرمت اور نالوں کی صفائی کا کام درکار ہے۔
ڈپٹی کمشنر نے موقع پر موجود NHA کے ڈائریکٹر سے تمام ضروری لوازمات اور کام کے آغاز کے حوالے سے تفصیلات دریافت کیں اور ہدایت کی کہ کے جلد از جلد کام کا باقاعدہ آغاز یقینی بنایا جائے۔
اس موقع پر طلبہ قیادت نے ڈپٹی کمشنر اور NHA کے ڈائریکٹر کو آگاہ کیا کہ وہ اس پورے منصوبے کا روزانہ کی بنیاد پر جائزہ لیں گے اور کام میں کسی بھی کمی بیشی کے حوالے سے متعلقہ حکام کو مسلسل آگاہ کرتے رہیں گے۔ ڈپٹی کمشنر نے بھی تسلی بخش اور معیاری کام کی یقین دہانی کرائی۔
بعد ازاں طلبہ قیادت نے ڈپٹی کمشنر کا شکریہ ادا کیا کہ انہوں نے طلبہ کی آواز کو سنا اور ان کے مطالبے پر فوری طور پر کام کے آغاز کے احکامات جاری کیے۔ طلبہ قیادت نے اس عزم کا اظہار کیا کہ یونیورسٹی روڈ تحریک تسلی بخش کام کی تکمیل تک جاری رہے گی۔
