بروغل میں کھلی کچہری، مسائل کا انبار، بعض مسائل کے حل کیلئے ڈپٹی کمشنر کی طرف سے موقع پر احکامات جاری
.
اپرچترال ( نمائندہ چترال ٹائمز ) چترال کے دور افتادہ اورانتہائی پسماندہ علاقہ بروغل میں ضلعی انتظامیہ اپرچترال کی جانب سے کھلی کچہری کا انعقاد کیا گیا۔ جس کی صدارت ڈپٹی کمشنر محمد عمران خان نے کی۔جہاں مسائل کے انبار لگادیئے گئے۔
کھلی کچہری میں ڈسٹرکٹ پولیس آفیسر، ڈسٹرکٹ ہیلتھ آفیسر، تحصیل میونسپل آفیسر مستوج، مختلف لائن ڈیپارٹمنٹس کے افسران، منتخب عوامی نمائندوں اور مقامی افراد کی بڑی تعداد نے شرکت کی۔
اس موقع پر عوام نے مستوج-بروغل روڈ کی خستہ حالی، صحت و تعلیم کی سہولیات کی کمی، بروغل سول ڈسپنسری میں ڈاکٹر کی عدم تعیناتی، وٹرنری ہسپتال کے مسائل اور پینے کے صاف پانی کی فراہمی سمیت مختلف مسائل پیش کیے۔
ڈپٹی کمشنر نے عوامی مسائل کو تفصیل سے سنا اور متعدد مسائل کے فوری حل کے لیے موقع پر ہی احکامات جاری کیے۔ بروغل سول ڈسپنسری میں ڈاکٹر کی خالی آسامی پر فوری تعیناتی سمیت وٹرنری ہسپتال کے مسائل کے حل کے لیے متعلقہ حکام کو فوری اقدامات کی ہدایت کی ۔
مزید برآں دیگر مسائل کے حل کے لیے بھی متعلقہ محکموں کو فوری عملدرآمد یقینی بنانے کی ہدایات جاری کی گئیں۔
اپنے خطاب میں ڈپٹی کمشنر نے کہا کہ پسماندہ علاقوں کی ترقی ضلعی انتظامیہ کی اولین ترجیح ہے اور افسران کو ہدایت کی گئی ہے کہ وہ بروغل ویلی کے باقاعدہ دورے کریں اور مسائل کے حل کی پیش رفت رپورٹ پیش کریں۔ انہوں نے محکمہ خوراک، سی اینڈ ڈبلیو، تعلیم، پبلک ہیلتھ، ہیلتھ اور وٹرنری محکموں کو عوامی شکایات کے فوری ازالے کی بھی ہدایت کی۔
کھلی کچہری کے انعقاد اور موقع پر مسائل کے حل پر مقامی عوام نے ضلعی انتظامیہ کا شکریہ ادا کیا اور اسے ایک مثبت پیش رفت قرار دیا۔
دریں اثنا ڈپٹی کمشن نے ڈی پی او کے ہمراہ یارخون لشٹ میں سرکاری گودام کی بھی معائنہ کیا، دورانِ انسپکشن انہوں نے گودام میں موجود گندم کے ذخیرے، معیار اور وزن کا بغور جائزہ لیا۔ اس موقع پر گندم کی دستیابی کو وافر جبکہ اس کے معیار اور وزن کو بھی تسلی بخش قرار دیا گیا۔اسی طرح ڈپٹی کمشنر یارخون ویلی کے مختلف سرکاری سکولوں اورسول ڈسپنسری کا بھی دورہ کیا ۔
