وزیراعلیٰ کا پشاور نوشہرہ اور جہانگیرہ کے درمیان ریلوے سیکشن کے لیے ابتدائی فزیبلٹی اسٹڈی کی منظوری، 13.162 ملین روپے کی فراہمی کی بھی منظوری دیدی گئی
پشاور ( نمائندہ چترال ٹائمز ) وزیر اعلیٰ خیبرپختونخوا محمد سہیل آفریدی کی زیر صدارت خیبرپختونخوا اربن موبیلٹی اتھارٹی کے بورڈ آف ڈائریکٹرز کا بیسواں اجلاس پشاور میں منعقد ہوا، جس میں صوبے میں شہری نقل و حرکت کے نظام کی بہتری، ٹریفک مسائل کے پائیدار حل اور جدید مواصلاتی سہولیات کے فروغ سے متعلق اہم امور پر تفصیلی غور کیا گیا۔ اجلاس میں متعلقہ حکام نے جاری منصوبوں اور آئندہ کے لائحہ عمل پر بریفنگ دی جبکہ شہری ٹرانسپورٹ کے نظام کو مو ثر اور جدید خطوط پر استوار کرنے کے لیے مختلف تجاویز پیش کی گئیں۔
اجلاس کے دوران وزیر اعلیٰ محمد سہیل آفریدی نے پشاور، نوشہرہ اور جہانگیرہ کے درمیان ریلوے سیکشن کے لیے ابتدائی فزیبلٹی اسٹڈی کی منظوری دیتے ہوئے اس مقصد کے لیے 13.162 ملین روپے کی فراہمی کی بھی منظوری دی۔ وزیر اعلیٰ نے اس منصوبے کو صوبے میں آمدورفت کے نظام کی بہتری اور علاقائی رابطوں کے فروغ کے لیے اہم قرار دیتے ہوئے متعلقہ حکام کو ہدایت کی کہ ابتدائی فزیبلٹی کا عمل بروقت اور معیاری انداز میں مکمل کیا جائے۔اجلاس میں اس مقصد کے لیے کے پی اربن موبیلٹی اتھارٹی کو پاک آسٹریا فخہ شولے انسٹیٹیوٹ آف اپلائیڈ سائنسز کے ساتھ کنسلٹنسی معاہدہ کرنے کی اجازت دی گئی تاکہ جدید ٹیکنیکل مہارت اور بین الاقوامی تجربات سے استفادہ حاصل کیا جا سکے۔
وزیر اعلیٰ نے اس ضمن میں منصوبے کی شرائط و ضوابط، بجٹ اور دیگر متعلقہ اخراجات کی بھی منظوری دے دی۔ وزیر اعلیٰ محمد سہیل آفریدی نے پشاور تا طورخم ریلوے منصوبے کی ابتدائی فزیبلٹی کو بھی تیز رفتار بنیادوں پر مکمل کرنے کی ہدایت جاری کرتے ہوئے کہا کہ یہ منصوبہ نہ صرف علاقائی تجارت بلکہ سرحدی روابط کے فروغ میں بھی اہم کردار ادا کرے گا۔ انہوں نے کے پی اربن موبیلٹی اتھارٹی کو ہدایت کی کہ صوبے میں بڑھتے ہوئے ٹریفک مسائل کے مو ثر حل اور شہری و بین الاضلاعی رابطوں کی بہتری کے لیے جدید خطوط پر استوار تجاویز پر سنجیدگی سے کام کیا جائے تاکہ عوام کو بہتر سفری سہولیات فراہم کی جا سکیں اور شہری نظام کو جدید تقاضوں سے ہم آہنگ بنایا جا سکے۔
۔
۔
عمران خان اور ان کی اہلیہ کے ساتھ روا رکھا جانے والا سلوک نہایت تشویشناک ہے، خصوصاً اس تناظر میں کہ عمران خان کی اہلیہ ایک غیر سیاسی خاتون ہیں جنہیں تنہائی میں رکھا گیا اور ملاقاتوں تک سے محروم کیا گیا..وزیراعلیٰ محمد سہیل آفریدی
۔
پشاور ( نمائندہ چترال ٹائمز ) وزیر اعلیٰ خیبرپختونخوا محمد سہیل آفریدی نے پشاور میں منعقدہ وکلاءجرگے سے خطاب کرتے ہوئے کہا کہ اس جرگے کے انعقاد کی تجویز معزز عدلیہ کے ججز کی جانب سے پیش کی گئی تاکہ ملک میں رائج غیر قانونی نظام کے خلاف مو ثر اور منظم مزاحمت کی راہ ہموار کی جا سکے۔ انہوں نے وکلاءبرادری کو مخاطب کرتے ہوئے کہا کہ آپ کے پاس عزم، حوصلہ اور طاقت موجود ہے اور اب وقت آ چکا ہے کہ اپنے حق کے حصول کے لیے اس قوت کا بھرپور اظہار کیا جائے، کیونکہ اگر آج مزاحمت نہ کی گئی تو آنے والی نسلیں غلامی کی زنجیروں میں جکڑی جائیں گی۔
وزیر اعلیٰ نے عدالتی احکامات کی خلاف ورزی پر سخت تشویش کا اظہار کرتے ہوئے کہا کہ اسلام آباد ہائی کورٹ کے تین ججز نے انہیں عمران خان سے ملاقات کی اجازت دی، تاہم اڈیالہ جیل کے سپرنٹنڈنٹ نے اس حکم کو صریحاً نظر انداز کیا جو کہ نہ صرف عدلیہ کی توہین ہے بلکہ آئین کی بالادستی پر بھی سوالیہ نشان ہے۔ انہوں نے استفسار کیا کہ اگر ایک سرکاری افسر ججز کے احکامات ماننے سے انکار کرے تو پھر آئین و قانون کی کیا حیثیت باقی رہ جاتی ہے۔محمد سہیل آفریدی نے واضح کیا کہ ان کی حکومت اور جماعت ملک میں آئین و قانون کی بالادستی، حقیقی انصاف اور عوام کو ان کے بنیادی حقوق کی فراہمی کی خواہاں ہے، تاہم موجودہ حالات میں انصاف کا فقدان نمایاں طور پر محسوس کیا جا رہا ہے۔
انہوں نے کہا کہ عمران خان اور ان کی اہلیہ کے ساتھ روا رکھا جانے والا سلوک نہایت تشویشناک ہے، خصوصاً اس تناظر میں کہ عمران خان کی اہلیہ ایک غیر سیاسی خاتون ہیں جنہیں تنہائی میں رکھا گیا اور ملاقاتوں تک سے محروم کیا گیا۔ انہوں نے مزید کہا کہ اگر قانون کے نام پر گولیاں چلائی جا سکتی ہیں تو وہ اسی آئین و قانون کی سربلندی کے لیے گولیاں کھانے کے لیے بھی تیار ہیں، تاہم اس کے باوجود وہ کسی بھی صورت ہتھیار نہیں اٹھائیں گے اور نہ ہی کوئی غیر آئینی قدم اٹھایا جائے گا۔ وزیر اعلیٰ نے کہا کہ وہ اسلام آباد ہائی کورٹ کے ایک جج سے ملاقات کے لیے گئے مگر طویل انتظار کے باوجود نا صرف ملاقات نہ ہو سکی بلکہ سلام کا جواب دینا بھی گوارا نہیں کیا گیا، جو کہ نظامِ انصاف کی موجودہ کیفیت کی عکاسی کرتا ہے۔
انہوں نے کہا کہ تمام آئینی و قانونی راستے اختیار کرنے کے باوجود انصاف کہیں دکھائی نہیں دے رہا اور اگر آج ایک سیاسی جماعت کو نشانہ بنایا جا رہا ہے تو کل یہی رویہ دیگر جماعتوں کے ساتھ بھی اختیار کیا جائے گا۔ وزیر اعلیٰ نے اس امر پر بھی تشویش کا اظہار کیا کہ وکلاءبرادری کو بھی دباو کا سامنا ہے اور انہیں فوجی عدالتوں میں پیش کیے جانے کے واقعات سامنے آ رہے ہیں، جس کے باعث پوری قوم کی نظریں اب وکلاءبرادری پر مرکوز ہیں۔انہوں نے وکلاءکو مخاطب کرتے ہوئے کہا کہ آپ کو اس صورتحال میں مو ثر مزاحمت کرنا ہوگی اور یقین دلایا کہ وہ خود اور پوری قوم وکلائ کے ساتھ کھڑی ہے۔ انہوں نے بتایا کہ بائیس اپریل کو عمران خان اور بشریٰ بی بی کے کیسز مقرر ہیں اور وکلاءکو چاہیے کہ وہ ان کیسز میں شفاف ٹرائل کو یقینی بنانے کے لیے اپنا بھرپور کردار ادا کریں۔
مزید برآں انہوں نے کہا کہ ستائیس اپریل کو کراچی میں بھی وکلاءجرگہ منعقد ہوگا جس میں آئندہ کے لائحہ عمل پر غور کیا جائے گا۔وزیر اعلیٰ نے واضح کیا کہ اگر پانچ مئی تک شفاف ٹرائل کو یقینی نہ بنایا گیا تو چھ مئی کو ملک بھر میں مکمل قلم چھوڑ ہڑتال کی جائے گی۔ انہوں نے کہا کہ آج کے جرگے میں وکلاءکی بھرپور شرکت اور طاقت کے مظاہرے نے ایک واضح پیغام دیا ہے جس سے بعض عناصر کی نیندیں اڑ چکی ہیں اور اب یہ جدوجہد مزید شدت اختیار کرے گی۔ اپنے خطاب کے اختتام پر انہوں نے کہا کہ ظلم کبھی مستقل نہیں رہتا، چاہے کتنا ہی بڑھ جائے بالآخر مٹ جاتا ہے اور حق و سچ کی ہی فتح ہوتی ہے۔
انہوں نے شاندار جرگے کے انعقاد پر صوبے خصوصاً پشاور کے وکلاءکو مبارکباد پیش کی اور ملک بھر سے کثیر تعداد میں شرکت یقینی بنانے پر وکلاء برادری کو خراج تحسین پیش کیا۔ سینئر قانون دان سلمان اکرم راجہ اور دیگر نے بھی جرگے سے خطاب کیا اور آئین و قانون کی بالادستی، ظلم و فسطائیت کے خاتمے اور انصاف کے حصول کے لیے اپنے عزائم کا اظہار کیا۔ اس موقع پر ملک میں قانون کی بالادستی اور ظلم و جبر کے خاتمے کے لیے مشترکہ جدوجہد جاری رکھنے کے لیے متفقہ قراردادیں بھی پیش کی گئیں۔